ਨਵੀਨ ਅਰੋੜਾ ਹੱਤਿਆਕਾਂਡ: ਮੁੱਖ ਸ਼ੂਟਰ ਬਾਦਲ ਦਾ ਇਨਕਾਊਂਟਰ, ਹੋਈ ਮੌਤ
ਨਵੀਨ ਅਰੋੜਾ ਹੱਤਿਆਕਾਂਡ: ਮੁੱਖ ਸ਼ੂਟਰ ਬਾਦਲ ਦਾ ਇਨਕਾਊਂਟਰ, ਹੋਈ ਮੌਤ
ਫਿਰੋਜ਼ਪੁਰ/ਫਾਜ਼ਿਲਕਾ (ਸਿਟੀਜਨਜ਼ ਵੋਇਸ)
ਨਵੀਨ ਅਰੋੜਾ ਹੱਤਿਆਕਾਂਡ ਵਿੱਚ ਅੱਜ ਇੱਕ ਵੱਡਾ ਮੋੜ ਆਇਆ ਹੈ। ਇਸ ਮਾਮਲੇ ਵਿੱਚ ਸ਼ਾਮਿਲ ਮੁੱਖ ਸ਼ੂਟਰ ਬਾਦਲ ਦਾ ਪੁਲਿਸ ਵੱਲੋਂ ਫਾਜ਼ਿਲਕਾ ਨੇੜੇ ਮਾਮੂ ਜੋਇਆ ਪਿੰਡ ਵਿੱਚ ਇਨਕਾਊਂਟਰ ਹੋਇਆ, ਜਿਸ ਵਿੱਚ ਬਾਦਲ ਦੀ ਮੌਤ ਹੋ ਗਈ।
ਨਵੀਨ ਕੂਮਾਰ ਕਤਲ ਕੇਸ ਦੇ ਮੁੱਖ ਸ਼ੂਟਰ ਬਾਦਲ ਨੂੰ ਫਾਜ਼ਿਲਕਾ ਜ਼ਿਲ੍ਹੇ ਦੇ ਪਿੰਡ ਮਾਮੂ ਜੋਇਆ ਦੇ ਨੇੜੇ ਪੁਲਿਸ ਅਤੇ ਸ਼ੂਟਰਾਂ ਵਿਚਕਾਰ ਹੋਈ ਮੁਠਭੇਡ ਵਿੱਚ ਮਾਰ ਦਿੱਤਾ ਗਿਆ। ਬਾਦਲ ਫਿਰੋਜ਼ਪੁਰ ਸ਼ਹਿਰ ਦੀ ਬਸਤੀ ਭੱਟੀਆ ਦਾ ਰਹਿਣ ਵਾਲਾ ਸੀ। ਇਹ ਜਾਣਕਾਰੀ ਦਿੰਦਿਆਂ ਫਿਰੋਜ਼ਪੁਰ ਰੇਂਜ ਦੇ ਡੀ.ਆਈ.ਜੀ. ਹਰਮਨਬੀਰ ਸਿੰਘ ਨੇ ਕਿਹਾ ਕਿ ਫਿਰੋਜ਼ਪੁਰ ਜ਼ਿਲ੍ਹਾ ਪੁਲਿਸ ਦੀ ਇੱਕ ਟੀਮ, ਜਿਸ ਦੀ ਅਗਵਾਈ ਡੀ.ਐਸ.ਪੀ. ਸਿਟੀ ਅਤੇ ਡੀ.ਐਸ.ਪੀ. ਡੀ.ਸੀਆਈ.ਏ. ਕਰ ਰਹੇ ਸਨ, ਬਾਦਲ ਦੀ ਜਾਣਕਾਰੀ ਦੇ ਅਧਾਰ ‘ਤੇ ਹਥਿਆਰ ਬਰਾਮਦ ਕਰਨ ਅਤੇ ਉਸ ਦੇ ਦੋ ਸਾਥੀਆਂ ਨੂੰ ਕਾਬੂ ਕਰਨ ਲਈ ਸ਼ਮਸ਼ਾਨਘਾਟ ਦੇ ਨੇੜੇ ਪਹੁੰਚੀ। ਉੱਥੇ ਮੌਜੂਦ ਹੋਰ ਦੋ ਸ਼ੂਟਰਾਂ ਨੇ ਪੁਲਿਸ ‘ਤੇ ਫਾਇਰਿੰਗ ਕਰ ਦਿੱਤੀ।
ਕਰਾਸ-ਫਾਇਰਿੰਗ ਦੌਰਾਨ ਹੈਡ ਕਾਂਸਟੇਬਲ ਬਲੌਰ ਸਿੰਘ ਦੀ ਬਾਂਹ ‘ਤੇ ਗੋਲੀ ਲੱਗੀ, ਜਦਕਿ ਇਕ ਹੋਰ ਪੁਲਿਸਕਰਮੀ ਦੇ ਬੁਲੇਟਪ੍ਰੂਫ ਜੈਕਟ ‘ਤੇ ਵੀ ਗੋਲੀ ਲੱਗੀ। ਪੁਲਿਸ ਵੱਲੋਂ ਜਵਾਬੀ ਕਾਰਵਾਈ ਦੌਰਾਨ ਮੁੱਖ ਸ਼ੂਟਰ ਬਾਦਲ ਗੰਭੀਰ ਜ਼ਖ਼ਮੀ ਹੋ ਗਿਆ। ਜ਼ਖ਼ਮੀ ਹੈਡ ਕਾਂਸਟੇਬਲ ਅਤੇ ਬਾਦਲ ਦੋਵਾਂ ਨੂੰ ਫਾਜ਼ਿਲਕਾ ਸਿਵਲ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ, ਜਿੱਥੇ ਬਾਦਲ ਨੇ ਦਮ ਤੋੜ ਦਿੱਤਾ।
ਇਹ ਵੀ ਦੱਸਿਆ ਗਿਆ ਕਿ ਫਿਰੋਜ਼ਪੁਰ ਵਿੱਚ ਕਾਰਕੁਨ ਨਵੀਨ ਕੂਮਾਰ ਦੀ ਹੱਤਿਆ ਕੇਸ ਵਿੱਚ ਕਾਲੀ, ਕਨਵ ਅਤੇ ਹਰਸ਼ ਨਾਂ ਦੇ ਤਿੰਨ ਸ਼ੂਟਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ। ਗ੍ਰਿਫ਼ਤਾਰੀ ਦੌਰਾਨ ਕਾਲੀ ਨੇ ਵੀ ਪੁਲਿਸ ‘ਤੇ ਗੋਲੀ ਚਲਾਈ ਸੀ ਅਤੇ ਜ਼ਖ਼ਮੀ ਹੋਇਆ ਸੀ। ਬਾਕੀ ਦੋਸ਼ੀਆਂ ਦੀ ਪੁਲਿਸ ਵੱਲੋਂ ਤਲਾਸ਼ ਜਾਰੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਹੋਰ ਵਿਕਾਸਾਂ ਬਾਰੇ ਜਾਣਕਾਰੀ ਵੱਖੋਂ ਸਾਂਝੀ ਕੀਤੀ ਜਾਵੇਗੀ।
