ਅੰਮ੍ਰਿਤਸਰ ‘ਚ ਅਣਪਛਾਤੇ ਵਿਅਕਤੀਆਂ ਵੱਲੋਂ ਇੱਕ ਨੌਜਵਾਨ ਦਾ ਕਤਲ

ਅੰਮ੍ਰਿਤਸਰ 09 ਅਕਤੂਬਰ2022 (ਸਿਟੀਜ਼ਨਜ਼ ਵੋਇਸ )

ਪੰਜਾਬ ਦੇ ਅੰਮ੍ਰਿਤਸਰ ‘ਚ ਸ਼ਨਿੱਚਰਵਾਰ ਨੂੰ ਅਣਪਛਾਤੇ ਵਿਅਕਤੀਆਂ ਵੱਲੋਂ ਇੱਕ ਨੌਜਵਾਨ ਦਾ ਕਤਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਨੌਜਵਾਨ ਨੂੰ ਹਥਿਆਰਾਂ ਨਾਲ ਵੱਡਿਆ ਗਿਆ ਹੈ। ਪੁਲਿਸ ਨੇ ਲਾਸ਼ ਨੂੰ ਕਬਜੇ ‘ਚ ਲੈ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।ਮਰਨ ਵਾਲੇ ਨੌਜਵਾਨ ‘ਤੇ ਪਹਿਲਾਂ ਐਨਡੀਪੀਐਸ ਦਾ ਮਾਮਲਾ ਦਰਜ਼ ਸੀ, ਜਿਸ ਦੇ ਚੱਲਦੇ ਪੁਲਿਸ ਕਤਲ ਦੇ ਇਸ ਮਾਮਲੇ ਨੂੰ ਨਸ਼ੇ ਜਾਂ ਪੈਸਿਆਂ ਦੇ ਲੈਣਦੇਣ ਨਾਲ ਜੋੜ ਰਹੀ ਹੈ।

ਇਹ ਕਤਲ ਮਕਬੂਲਪੁਰਾ ਏਰਿਆ ਅੰਦਰ 13 ਨੰਬਰ ਗਲੀ ‘ਚ ਹੋਇਆ ਹੈ। ਮਰਨ ਵਾਲੇ ਦੀ ਪਛਾਣ 25 ਸਾਲਾਂ ਸਾਹਿਲਪ੍ਰੀਤ ਦੇ ਰੂਪ ‘ਚ ਹੋਈ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਸਾਹਿਲ ਅਪਣੇ ਘਰ ਤੋਂ ਬਾਹਰ ਸੀ, ਤੱਦ ਹੀ ਮੁਲਜ਼ਮਾਂ ਨੇ ਤੇਜ ਹਥਿਆਰਾਂ ਨਾਲ ਉਸ ‘ਤੇ ਹਮਲਾ ਕੀਤਾ ਹੈ। ਹਮਲੇ ਤੋਂ ਬਾਅਦ ਨੇੜੇ ਦੇ ਲੋਕ ਉਸ ਨੂੰ ਹਸਪਤਾਲ ਲੈ ਗਏ ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤ ਐਲਾਨ ਦਿੱਤਾ।