ਫ਼ਿਰੋਜ਼ਪੁਰ ਛਾਉਣੀ ‘ਚ ਇੱਕ ਡੇਅਰੀ ‘ਤੇ ਛਾਪਾ ਮਾਰ ਕੇ ਕੀਤੀ ਚੈਕਿੰਗ ,ਦੇਸੀ ਘਿਓ ਦੇ ਡਰੰਮ ਚੋਂ ਮਿਲੇ ਮਰੇ ਹੋਏ ਚੂਹੇ

ਫ਼ਿਰੋਜ਼ਪੁਰ ਛਾਉਣੀ ‘ਚ ਇੱਕ ਡੇਅਰੀ ‘ਤੇ ਛਾਪਾ ਮਾਰ ਕੇ ਕੀਤੀ ਚੈਕਿੰਗ ,ਦੇਸੀ ਘਿਓ ਦੇ ਡਰੰਮ ਚੋਂ ਮਿਲੇ ਮਰੇ ਹੋਏ ਚੂਹੇ
ਫਿਰੋਜ਼ਪੁਰ,15 ਮਈ , 2024 (ਅਨੁਜ ਕੱਕੜ ਟੀਨੂੰ )

ਪੰਜਾਬੀ ਦੀ ਰਸੋਈ ਵਿਚ ਘਿਓ ਤੋਂ ਬਿਨਾਂ ਕਈ ਪਕਵਾਨ ਤਿਆਰ ਕਰਨਾ ਬਹੁਤ ਮੁਸ਼ਕਲ ਹੈ। ਪਰਾਠੇ ਤੋਂ ਲੈ ਕੇ ਹਲਵੇ ਤੱਕ ਅਤੇ ਹੋਰ ਪਤਾ ਨਹੀਂ ਕਈ ਅਣਗਿਣਤ ਚੀਜ਼ਾਂ, ਅਸੀਂ ਘਿਓ ਚ ਬਣਾਉਣਾ ਪਸੰਦ ਕਰਦੇ ਹਾਂ। ਦਾਲ ‘ਚ ਘਿਓ ਮਿਲਾ ਲਿਆ ਜਾਵੇ ਤਾਂ ਇਸ ਦਾ ਮਜ਼ਾ ਦੁੱਗਣਾ ਹੋ ਜਾਂਦਾ ਹੈ। ਕਿਉਂਕਿ ਇਹ ਸਿਹਤਮੰਦ ਹੈ, ਸਾਡੀਆਂ ਨਾਨੀਆਂ – ਦਾਦੀਆਂ ਤੋਂ ਲੈ ਕੇ ਸਾਡੀਆਂ ਮਾਵਾਂ ਤੱਕ, ਉਹ ਰੋਟੀਆਂ ਅਤੇ ਪਰਾਂਠੇ ਵਿੱਚ ਘਿਓ ਲਗਾ ਕੇ ਸਾਨੂੰ ਚੋਪੜ ਕੇ ਦੀਆ ਕਰਦੀਆਂ ਹਨ ।

ਪਰ ਕੀ ਤੁਹਾਡੇ ਮਨ ਵਿਚ ਇਹ ਖਿਆਲ ਆਇਆ ਹੈ ਕਿ ਜੋ ਘਿਓ ਤੁਸੀਂ ਲਿਆਇਆ ਹੈ ਉਸਦੀ ਕਵਾਲਟੀ ਸਹੀ ਹੈ ? ਕਈ ਲੋਕ ਇਹ ਸੋਚਦੇ ਹਨ ਕਿ ਬਾਜ਼ਾਰੀ ਕੰਪਨੀਆਂ ਦੇ ਘਿਓ ਦੇ ਪੈਕੇਟ ਸਹੀ ਨਹੀਂ ਹੁੰਦੇ ਅਤੇ ਓਹਨਾ ਚ ਮਿਲਾਵਟ ਹੋ ਸਕਦੀ ਹੈ ਸਗੋਂ ਇਸ ਤੋਂ ਚੰਗਾ ਕਿਸੇ ਡੇਅਰੀ ਤੋਂ ਘਿਓ ਜਾ ਕ੍ਰੀਮ ਲੈ ਲੈਣੇ ਆ , ਇਹ ਖ਼ਾਲਸ ਹੋਊ ਅਤੇ ਸਾਫ ਸੁਥਰਾ ਹੋਊ। ਓਹਨਾ ਲੋਕਾਂ ਨੂੰ ਕਿ ਪਤਾ ਕਿ ਡੇਅਰੀ ਸੰਚਾਲਕਾਂ ਵਲੋਂ ਥੋੜੇ ਲਾਲਚ ਪਿੱਛੇ  ਕਿਸ ਤਰ੍ਹਾਂ ਓਹਨਾ ਦੀ ਅਤੇ ਓਹਨਾ ਦੇ ਬੱਚਿਆਂ ਦੀ ਸਿਹਤ ਨਾਲ ਖਿਲਵਾੜ ਕੀਤਾ ਜਾ ਰਿਹਾ ਹੈ ।ਅਜਿਹਾ ਹੀ ਮਾਮਲਾ ਫਿਰੋਜ਼ਪੁਰ ਵਿੱਚ ਦੇਖਣ ਨੂੰ ਮਿਲਿਆ ਹੈ ।

ਸਿਹਤ ਵਿਭਾਗ ਵੱਲੋਂ ਫੂਡ ਸੇਫਟੀ ਵਿਭਾਗ ਦੀ ਟੀਮ ਨੇ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਮਿਲਣ ‘ਤੇ ਫ਼ਿਰੋਜ਼ਪੁਰ ਛਾਉਣੀ ‘ਚ ਇੱਕ ਡੇਅਰੀ ‘ਤੇ ਛਾਪਾ ਮਾਰ ਕੇ ਚੈਕਿੰਗ ਕੀਤੀ, ਜਿਸ ‘ਚ ਦੇਸੀ ਘਿਓ ਦੇ ਡਰੰਮ ‘ਚ ਚੂਹੇ ਮਰੇ ਹੋਏ ਪਾਏ ਗਏ ਅਤੇ ਆਲੇ-ਦੁਆਲੇ ਕੀੜੇ-ਮਕੌੜੇ ਦੌੜ ਰਹੇ ਸਨ।ਸਫ਼ਾਈ ਦਾ ਬਿਲਕੁਲ ਵੀ ਧਿਆਨ ਨਹੀਂ ਰੱਖਿਆ ਜਾ ਰਿਹਾ ਸੀ ਅਤੇ ਨਾ ਹੀ ਡੇਅਰੀ ਦਾ ਲਾਇਸੈਂਸ ਸੀ, ਜਿਸ ਕਾਰਨ ਫੂਡ ਸੇਫ਼ਟੀ ਵਿਭਾਗ ਦੀ ਟੀਮ ਨੇ ਦੇਸੀ ਘਿਓ ਅਤੇ ਪਨੀਰ ਦੇ ਸੈਂਪਲ ਲਏ। ਜਾਣਕਾਰੀ ਦਿੰਦੇ ਹੋਏ ਇਸ਼ਾਨ ਬਾਂਸਲ ਅਤੇ ਅਭਿਨਵ ਖੋਸਲਾ ਫੂਡ ਇੰਸਪੈਕਟਰ ਨੇ ਦੱਸਿਆ ਕਿ ਚੋਣ ਕਮਿਸ਼ਨ ਵਲੋਂ ਸ਼ਿਕਾਇਤ ਮਿਲਣ ‘ਤੇ ਕੈਂਟ ਨੰਬਰ 7 ਦੀ ਮੰਡੀ ‘ਚ ਇਕ ਡੇਅਰੀ ‘ਤੇ ਛਾਪਾ ਮਾਰਿਆ ਗਿਆ ਅਤੇ ਚੈਕਿੰਗ ਕੀਤੀ ਗਈ, ਜਿਸ ‘ਚ ਦੇਸੀ ਘਿਓ ਦੇ 25 ਡਰੰਮ ਸੀ ਜਿਨ੍ਹਾਂ ਤੇ ਨੰਬਰ ਵੀ ਲਿਖੇ ਹੋਏ ਸੀ  A19 ਅਤੇ A23 ਡਰੰਮ ‘ਚ ਮਰੇ ਹੋਏ ਚੂਹੇ ਪਾਏ ਗਏ।

ਡੇਅਰੀ ਉਤੇ  5 ਹਜ਼ਾਰ  ਕਿੱਲੋ ਦੇਸੀ ਘਿਓ ਤੇ ਪਨੀਰ ਸੀ। ਫੂਡ ਇੰਸਪੈਕਟਰ ਨੇ ਦੱਸਿਆ ਕਿ ਦੇਸੀ ਘਿਓ ਅਤੇ ਪਨੀਰ ਦੇ ਸੈਂਪਲ ਲਏ ਗਏ ਹਨ, ਸੈਂਪਲਾਂ ਦੀ ਰਿਪੋਰਟ ਆਉਣ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ। ਫੂਡ ਇੰਸਪੈਕਟਰ ਨੇ ਦੱਸਿਆ ਕਿ ਦੇਸੀ ਘਿਓ ਅਤੇ ਪਨੀਰ ਦੇ ਸੈਂਪਲ ਲਏ ਗਏ ਹਨ, ਸੈਂਪਲਾਂ ਦੀ ਰਿਪੋਰਟ ਆਉਣ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।

ਪੰਜਾਬ ਵਿੱਚ ਲੋਕਾਂ ਦੀ ਸਿਹਤ ਨਾਲ ਸ਼ਰੇਆਮ ਖਿਲਵਾੜ ਦੀਆਂ ਕਈ ਵਾਰ ਖਬਰਾਂ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ। ਪੰਜਾਬ ਵਿੱਚ ਮਠਿਆਈਆਂ ਦੀਆਂ ਦੁਕਾਨਾਂ ਅਤੇ ਡੇਅਰੀਆਂ ਉਪਰ ਸਾਫ ਸਫਾਈ ਦਾ ਧਿਆਨ ਨਹੀਂ ਰੱਖਿਆ ਜਾਂਦਾ ਹੈ। ਤਿਉਹਾਰਾਂ ਦੇ ਦਿਨਾਂ ਵਿੱਚ ਧੜੱਲੇ ਨਾਲ ਮਿਲਾਵਟੀ ਮਠਿਆਈ ਵੇਚੀ ਜਾਂਦੀ ਹੈ। ਇਸ ਨਾਲ ਲੋਕਾਂ ਦੀ ਸਿਹਤ ਨਾਲ ਸ਼ਰੇਆਮ ਖਿਲਵਾੜ ਕੀਤਾ ਜਾਂਦਾ ਹੈ।