ਫਿਰੋਜ਼ਪੁਰ SBI ਇੱਛੇ ਵਾਲਾ ਸ਼ਾਖਾ ਬਣੀ ਠੱਗਾਂ ਦੀ ਪਸੰਦੀਦਾ ਜਗ੍ਹਾ, 47 ਲੱਖ ਦੀ ਹੋਰ ਧੋਖਾਧੜੀ ਦਾ ਪਰਦਾਫਾਸ਼
ਫਿਰੋਜ਼ਪੁਰ SBI ਇੱਛੇ ਵਾਲਾ ਸ਼ਾਖਾ ਬਣੀ ਠੱਗਾਂ ਦੀ ਪਸੰਦੀਦਾ ਜਗ੍ਹਾ, 47 ਲੱਖ ਦੀ ਹੋਰ ਧੋਖਾਧੜੀ ਦਾ ਪਰਦਾਫਾਸ਼
ਫਿਰੋਜ਼ਪੁਰ, 1 ਜੁਲਾਈ (ਅਨੁਜ ਕੱਕੜ ਟੀਨੂੰ):
ਫਿਰੋਜ਼ਪੁਰ ਦੇ ਇੱਛੇ ਵਾਲਾ ਰੋਡ ‘ਤੇ ਸਥਿਤ ਸਟੇਟ ਬੈਂਕ ਆਫ ਇੰਡੀਆ ਦੀ ਸ਼ਾਖਾ ਇੱਕ ਵਾਰ ਫਿਰ ਚਰਚਾ ‘ਚ ਹੈ, ਪਰ ਇਸ ਵਾਰੀ ਕਾਰਨ ਕੋਈ ਵਧੀਆ ਬੈਂਕਿੰਗ ਸੇਵਾ ਨਹੀਂ, ਬਲਕਿ ਠੱਗੀ ਅਤੇ ਧੋਖਾਧੜੀ ਦੀ ਲੜੀ ਹੈ ਜੋ ਰੁਕਣ ਦਾ ਨਾਮ ਨਹੀਂ ਲੈ ਰਹੀ।
ਬੈਂਕ ਮੈਨੇਜਰ ਰਾਹੁਲ ਮੋਹਨ ਵੱਲੋਂ ਸਿਟੀ ਥਾਣੇ ਵਿੱਚ ਦਿੱਤੀ ਗਈ ਦਰਖਾਸਤ ਅਧੀਨ, 5 ਵਿਅਕਤੀਆਂ ਵੱਲੋਂ ਜਾਅਲੀ ਦਸਤਾਵੇਜ਼ ਅਤੇ ਪਛਾਣ ਪੱਤਰ ਪੇਸ਼ ਕਰਕੇ ਕਰੀਬ 46.85 ਲੱਖ ਰੁਪਏ ਦੀ ਠੱਗੀ ਕਰਨ ਦੀ ਸ਼ਿਕਾਇਤ ‘ਤੇ ਮਾਮਲਾ ਦਰਜ ਕੀਤਾ ਗਿਆ ਹੈ।
ਆਰੋਪੀਆਂ ਦੀ ਪਛਾਣ ਹੇਠ ਲਿਖੇ ਤੌਰ ਤੇ ਹੋਈ ਹੈ:
ਸੁਨੀਤਾ ਦੇਵੀ, ਕੈਥਲ (ਹਰਿਆਣਾ) – ₹10 ਲੱਖ
ਪ੍ਰੇਰਨਾ, ਆਦਮਪੁਰ, ਹਿਸਾਰ – ₹9.33 ਲੱਖ
ਸੰਜੇ ਕੁਮਾਰ, ਕੈਥਲ – ₹10 ਲੱਖ
ਕੁਸਮ ਰਾਣੀ, ਪਿਹੋਵਾ, ਕੁਰੂਕਸ਼ੇਤਰ – ₹9.43 ਲੱਖ
ਕਿਰਨ ਬਾਲਾ, ਫਤਿਹਾਬਾਦ – ₹8.09 ਲੱਖ
ਇਹ ਸਾਰੇ ਅਰੋਪੀ ਹਰਿਆਣਾ ਰਾਜ ਨਾਲ ਸੰਬੰਧਿਤ ਹਨ, ਅਤੇ ਉਨ੍ਹਾਂ ਵਿਰੁੱਧ ਭਾਰਤੀ ਨਿਆਏ ਸੰਹਿਤਾ (BNS) ਦੀਆਂ ਵੱਖ-ਵੱਖ ਧਾਰਾਵਾਂ 318(4), 336(2), 337, 338, 336(3), ਅਤੇ 340(2) ਅਧੀਨ ਮਾਮਲਾ ਦਰਜ ਕੀਤਾ ਗਿਆ ਹੈ।
ਜਾਂਚ ਅਧਿਕਾਰੀ ਜਤਿੰਦਰ ਸਿੰਘ ਦੀ ਅਗਵਾਈ ਹੇਠ ਜਾਂਚ ਜਾਰੀ ਹੈ, ਹਾਲਾਂਕਿ ਹੁਣ ਤੱਕ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ।
ਇਸ ਮਾਮਲੇ ਨਾਲ ਸਭ ਤੋਂ ਵੱਧ ਚਿੰਤਾਜਨਕ ਗੱਲ ਇਹ ਹੈ ਕਿ ਇਹ ਬਰਾਂਚ ਪਹਿਲਾਂ ਵੀ ਠੱਗਾਂ ਲਈ ਨਰਮ ਨਿਸ਼ਾਨਾ ਰਹੀ ਹੈ। 20 ਫਰਵਰੀ 2024 ਨੂੰ ਵੀ ਇੱਥੇ ਹੀ ਹੋਰ 4 ਵਿਅਕਤੀਆਂ ਵੱਲੋਂ ₹39.52 ਲੱਖ ਦੀ ਠੱਗੀ ਕਰਨ ਦਾ ਮਾਮਲਾ ਦਰਜ ਹੋਇਆ ਸੀ – ਇਹ ਅਰੋਪੀ ਵੀ ਹਰਿਆਣਾ ਦੇ ਰਹਿਣ ਵਾਲੇ ਸਨ।
ਸਵਾਲ ਇਹ ਹੈ ਕਿ ਠੱਗਾਂ ਨੂੰ ਫਿਰੋਜ਼ਪੁਰ ਦੀ ਇਹੀ SBI ਸ਼ਾਖਾ ਹੀ ਕਿਉਂ ਭਾਂਦੀ ਹੈ?
ਕੀ ਇਹ ਸਿਸਟਮ ਦੀ ਲਾਪਰਵਾਹੀ ਹੈ ਜਾਂ ਅੰਦਰੂਨੀ ਸਾਜ਼ਿਸ਼? ਇਹ ਜਾਣਚ ਦਾ ਵਿਸ਼ਾ ਬਣ ਚੁੱਕਾ ਹੈ।
