ਪਿਤਾ-ਪੁਤਰ ਦੇ ਰਿਸ਼ਤੇ ‘ਤੇ ਆਧਾਰਤ ਫਿਲਮ ‘ਘਿਚ ਪਿਚ’ ਨਾਲ ਕਬੀਰ ਨੰਦਾ ਦਾ ਬੋਲੀਵੁੱਡ ਚ ਡੈਬਿਊ

ਫ਼ਿਰੋਜ਼ਪੁਰ ਦੇ ਕਬੀਰ ਨੰਦਾ ਦੀ ਬਾਲੀਵੁੱਡ ਮੂਵੀ ਚ ‘ਘਿਚ ਪਿਚ’ ਨਾਲ ਸ਼ਾਨਦਾਰ ਐਂਟਰੀ

 ਫਿਰੋਜ਼ਪੁਰ ਤੋਂ ਫਿਲਮ ਸਿਟੀ ਤੱਕ: 18 ਸਾਲਾ ਕਬੀਰ ਨੰਦਾ ਹਿੰਦੀ ਫਿਲਮ ‘ਘਿਚ ਪਿਚ’ ਰਾਹੀਂ ਬਾਲੀਵੁੱਡ ‘ਚ ਕਰ ਰਹੇ ਡੈਬਿਊ

ਫ਼ਿਰੋਜ਼ਪੁਰ, 29 ਜੁਲਾਈ 2025 (ਅਨੁਜ ਕੱਕੜ ਟੀਨੂੰ)

ਸਰਹਦੀ ਜ਼ਿਲ੍ਹਾ ਫ਼ਿਰੋਜ਼ਪੁਰ ਦੇ 18 ਸਾਲਾ ਨੌਜਵਾਨ ਕਬੀਰ ਨੰਦਾ ਹੁਣ ਹਿੰਦੀ ਫੀਚਰ ਫਿਲਮ ‘ਘਿਚ ਪਿਚ’ ਵਿੱਚ ਮੁੱਖ ਭੂਮਿਕਾ ਨਿਭਾ ਕੇ ਬਾਲੀਵੁੱਡ ਵਿੱਚ ਆਪਣਾ ਡੈਬਿਊ ਕਰਨ ਜਾ ਰਹੇ ਹਨ। ਇਹ ਫਿਲਮ 8 ਅਗਸਤ ਨੂੰ ਥੀਏਟਰਾਂ ਵਿੱਚ ਰਿਲੀਜ਼ ਹੋਣੀ ਹੈ।

ਕਬੀਰ ਨੇ ਫ਼ਿਰੋਜ਼ਪੁਰ ਪ੍ਰੈਸ ਕਲੱਬ ਵਿੱਚ ਇੱਕ ਪ੍ਰੈਸ ਕਾਨਫਰੰਸ ਕਰਕੇ ਆਪਣੀ ਫਿਲਮ ਅਤੇ ਅਦਾਕਾਰੀ ਦੇ ਸਫਰ ਬਾਰੇ ਜਾਣਕਾਰੀ ਸਾਂਝੀ ਕੀਤੀ।

ਕਬੀਰ ਨੰਦਾ ਇਸ ਫਿਲਮ ਵਿੱਚ ਗੁਰਪ੍ਰੀਤ ਸਿੰਘ ਦਾ ਕਿਰਦਾਰ ਨਿਭਾ ਰਹੇ ਹਨ — ਇੱਕ ਪਗੜੀਧਾਰੀ ਨੌਜਵਾਨ ਜੋ 2000 ਦੇ ਸ਼ੁਰੂਆਤੀ ਦੌਰ ਦੇ ਚੰਡੀगढ़ ਵਿੱਚ ਰਹਿੰਦਾ ਹੈ। ਇਹ ਕਹਾਣੀ ਤਿੰਨ ਦੋਸਤਾਂ ਅਤੇ ਉਨ੍ਹਾਂ ਦੇ ਆਪਣੇ-ਆਪਣੇ ਪਿਤਾਵਾਂ ਨਾਲ ਭਾਵਨਾਤਮਕ ਅਤੇ ਜਟਿਲ ਰਿਸ਼ਤਿਆਂ ਨੂੰ ਦਰਸਾਉਂਦੀ ਹੈ।

‘ਘਿਚ ਪਿਚ’ ਇੱਕ ਕਮਿੰਗ-ਆਫ-ਏਜ ਡ੍ਰਾਮਾ ਹੈ, ਜੋ ਬਾਪ-ਬੇਟੇ ਦੇ ਰਿਸ਼ਤਿਆਂ ਵਿੱਚ ਆਉਂਦੇ ਟਕਰਾਵ, ਚੁੱਪ ਅਤੇ ਅੰਦਰੂਨੀ ਜੁੜਾਅ ਨੂੰ ਸੰਵੇਦਨਸ਼ੀਲ ਢੰਗ ਨਾਲ ਪੇਸ਼ ਕਰਦੀ ਹੈ।

ਬਚਪਨ ਤੋਂ ਹੀ ਕਬੀਰ ਨੂੰ ਅਦਾਕਾਰੀ ਦਾ ਸ਼ੌਂਕ ਸੀ। ਸਕੂਲ ਦੇ ਪ੍ਰੋਗਰਾਮਾਂ ਵਿੱਚ ਹਿੱਸਾ ਲੈਣ ਤੋਂ ਲੈ ਕੇ ਹੁਣ ਵੱਡੇ ਪਰਦੇ ‘ਤੇ ਮੁੱਖ ਕਿਰਦਾਰ ਤੱਕ, ਉਨ੍ਹਾਂ ਦਾ ਸਫਰ ਸੰਘਰਸ਼ ਅਤੇ ਦ੍ਰਿੜ਼ ਨਿਰਣੈ ਭਰਿਆ ਰਿਹਾ ਹੈ। ਫਿਲਮ ਇੰਡਸਟਰੀ ਵਿੱਚ ਕੋਈ ਵੀ ਪਰਿਵਾਰਕ ਬੈਕਗ੍ਰਾਊਂਡ ਨਾ ਹੋਣ ਦੇ ਬਾਵਜੂਦ, ਇੱਕ ਛੋਟੇ ਸ਼ਹਿਰ ਤੋਂ ਨਿਕਲ ਕੇ ਉਨ੍ਹਾਂ ਨੇ ਆਪਣੀ ਇੱਕ ਵੱਖਰੀ ਪਹਚਾਣ ਬਣਾਈ ਹੈ।

‘ਘਿਚ ਪਿਚ’ ਤੋਂ ਬਾਅਦ, ਕਬੀਰ ਨੰਦਾ Netflix ਦੀ ਹਿੱਟ ਸੀਰੀਜ਼ ‘ਕੋਹਰਾ’ ਦੇ ਦੂਜੇ ਸੀਜ਼ਨ ਵਿੱਚ ਮੁੱਖ ਭੂਮਿਕਾ ਨਿਭਾਉਂਦੇ ਨਜ਼ਰ ਆਉਣਗੇ। ਇਸ ਤੋਂ ਇਲਾਵਾ, ਉਹ ਡਾਈਸ ਮੀਡੀਆ ਦੀ ਆਉਣ ਵਾਲੀ ਵੈੱਬ ਸੀਰੀਜ਼ ‘ਇਕੱਠੇ’ ਦੀ ਵੀ ਸ਼ੂਟਿੰਗ ਪੂਰੀ ਕਰ ਚੁੱਕੇ ਹਨ।

ਕਬੀਰ ਨੰਦਾ ਨਵਾਂ ਚਿਹਰਾ ਹੋਣ ਦੇ ਨਾਲ-ਨਾਲ ਆਪਣੇ ਨਜਦੀਕੀ ਕਿਰਦਾਰ ਅਤੇ ਜੜ੍ਹਾਂ ਨਾਲ ਜੁੜੇ ਅਹਿਸਾਸਾਂ ਨੂੰ ਪਰਦੇ ‘ਤੇ ਲਿਆਉਂਦੇ ਨਜ਼ਰ ਆਉਣਗੇ। ‘ਘਿਚ ਪਿਚ’ ਉਨ੍ਹਾਂ ਦੇ ਕਰੀਅਰ ਦੀ ਇੱਕ ਉਮੀਦਭਰੀ ਅਤੇ ਮਜ਼ਬੂਤ ਸ਼ੁਰੂਆਤ ਸਾਬਤ ਹੋ ਰਹੀ ਹੈ।