ਵਿਵੇਕਾਨੰਦ ਵਰਲਡ ਸਕੂਲ ਵਿੱਚ ਜ਼ਿਲ੍ਹਾ ਸ਼ਤਰੰਜ ਮੁਕਾਬਲਾ 2025 ਦਾ ਸ਼ਾਨਦਾਰ ਆਯੋਜਨ
ਵਿਵੇਕਾਨੰਦ ਵਰਲਡ ਸਕੂਲ ਵਿੱਚ ਜ਼ਿਲ੍ਹਾ ਸ਼ਤਰੰਜ ਮੁਕਾਬਲਾ 2025 ਦਾ ਸ਼ਾਨਦਾਰ ਆਯੋਜਨ
ਫਿਰੋਜ਼ਪੁਰ 29 ਸਤੰਬਰ 2025 (ਅਨੁਜ ਕੱਕੜ ਟੀਨੂੰ)
ਵਿਵੇਕਾਨੰਦ ਵਰਲਡ ਸਕੂਲ ਵਿੱਚ ਜ਼ਿਲ੍ਹਾ ਸ਼ਤਰੰਜ ਮੁਕਾਬਲਾ 2025 ਦਾ ਕੱਲ੍ਹ ਸ਼ਾਨਦਾਰ ਆਯੋਜਨ ਕੀਤਾ ਗਿਆ। ਸਕੂਲ ਦੇ ਡਾਇਰੈਕਟਰ ਡਾ. ਐਸ. ਐਨ. ਰੁਦਰਾ ਨੇ ਦੱਸਿਆ ਕਿ ਇਸ ਮੁਕਾਬਲੇ ਦਾ ਮੁੱਖ ਉਦੇਸ਼ ਜ਼ਿਲ੍ਹੇ ਦੇ ਵਿਦਿਆਰਥੀਆਂ ਵਿੱਚ ਸ਼ਤਰੰਜ ਪ੍ਰਤੀ ਰੁਚੀ ਜਗਾਉਣਾ ਅਤੇ ਉਨ੍ਹਾਂ ਨੂੰ ਰਾਜ ਤੇ ਰਾਸ਼ਟਰੀ ਪੱਧਰ ‘ਤੇ ਆਪਣੇ ਹੁਨਰ ਦਾ ਪ੍ਰਦਰਸ਼ਨ ਕਰਨ ਦਾ ਮੌਕਾ ਦੇਣਾ ਸੀ।
ਇਹ ਮੁਕਾਬਲਾ ਜ਼ਿਲ੍ਹਾ ਸ਼ਤਰੰਜ ਐਸੋਸੀਏਸ਼ਨ ਫਿਰੋਜ਼ਪੁਰ ਦੀ ਨਿਗਰਾਨੀ ਹੇਠ ਐਡਵੋਕੇਟ ਵਿਵੇਕ ਜੈਨ ਦੀ ਅਗਵਾਈ ਵਿੱਚ ਕਰਵਾਇਆ ਗਿਆ। ਉਦਘਾਟਨ ਸਮਾਰੋਹ ਵਿੱਚ ਪ੍ਰੈੱਸ ਕਲੱਬ ਫਿਰੋਜ਼ਪੁਰ ਦੇ ਪ੍ਰਧਾਨ ਮਨਦੀਪ ਕੁਮਾਰ ਮੁੱਖ ਮਹਿਮਾਨ ਰਹੇ। ਪਰੰਪਰਾਗਤ ਦੀਪ ਰੌਸ਼ਨ ਕਰਕੇ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ ਗਈ ਅਤੇ ਮੁੱਖ ਮਹਿਮਾਨ ਦਾ ਸਨਮਾਨ ਸਮਰਪਣ ਚਿੰਨ੍ਹ ਦੇ ਕੇ ਕੀਤਾ ਗਿਆ। ਪੂਰੇ ਸਮਾਰੋਹ ਦਾ ਸੰਚਾਲਨ ਅੰਕੁਸ਼ ਕਥੂਰੀਆ, ਕੁਮਾਰ ਬੰਸਲ, ਰੀਆ, ਦਿਨੇਸ਼ ਗੇਰਾ ਅਤੇ ਸ਼ਿਲਪਾ ਗੇਰਾ ਨੇ ਕੀਤਾ।
ਸਮਾਪਤੀ ਸਮਾਰੋਹ ਵਿੱਚ ਸਤਲੁਜ ਪ੍ਰੈੱਸ ਕਲੱਬ ਦੇ ਪ੍ਰਧਾਨ ਵਿਜੇ ਸ਼ਰਮਾ ਮੁੱਖ ਮਹਿਮਾਨ ਰਹੇ ਜਦਕਿ ਵਿਸ਼ੇਸ਼ ਮਹਿਮਾਨਾਂ ਵਜੋਂ ਸਥਾਈ ਲੋਕ ਅਦਾਲਤ ਫਿਰੋਜ਼ਪੁਰ ਦੇ ਚੇਅਰਮੈਨ ਰਾਜੇਸ਼ਵਰ ਸ਼ੇਰਗਿੱਲ ਅਤੇ ਸੀਨੀਅਰ ਵਕੀਲ ਗੁਰਜੇਸ਼ ਬਜਾਜ ਸ਼ਾਮਲ ਰਹੇ। ਲਗਭਗ 100 ਖਿਡਾਰੀਆਂ ਨੇ ਭਾਗ ਲਿਆਂਦਾ ਅਤੇ ਆਪਣੀ ਪ੍ਰਤਿਭਾ ਨਾਲ ਦਰਸ਼ਕਾਂ ਨੂੰ ਮੋਹਿਆ।
ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਜੇਤੂਆਂ ਦੀ ਘੋਸ਼ਣਾ ਕੀਤੀ ਗਈ। ਅੰਡਰ–11 ਓਪਨ ਵਿੱਚ ਥਰਸ਼ਿਵ ਪਹਿਲੇ, ਜਸਕੀਰਤ ਸਿੰਘ ਦੂਜੇ ਅਤੇ ਜਾਖ ਜੈਨ ਤੀਜੇ ਸਥਾਨ ‘ਤੇ ਰਹੇ। ਕੁੜੀਆਂ ਵਿੱਚ ਅਕੀਦਤ ਕੌਰ ਪਹਿਲੀ, ਪ੍ਰਭਲੀਨ ਕੌਰ ਦੂਜੀ ਅਤੇ ਲਕਸ਼ਮੀ ਤੀਜੀ ਰਹੀ। ਅੰਡਰ–15 ਓਪਨ ਵਿੱਚ ਸਿਧਾਰਥ ਮੰਗਲ ਨੇ ਪਹਿਲਾ, ਅਭਿਸ਼ੇਕ ਬੰਸਲ ਨੇ ਦੂਜਾ ਅਤੇ ਚੇਤਨ ਪ੍ਰੀਤ ਸਿੰਘ ਮੋਤੀ ਨੇ ਤੀਜਾ ਸਥਾਨ ਹਾਸਲ ਕੀਤਾ। ਕੁੜੀਆਂ ਸ਼੍ਰੇਣੀ ਵਿੱਚ ਅਨਹਦਨੂਰ ਕੌਰ ਪਹਿਲੀ, ਗੁਰਨੂਰ ਕੌਰ ਦੂਜੀ ਅਤੇ ਹਰਬੀਰ ਕੌਰ ਤੀਜੀ ਰਹੀ। ਓਪਨ ਪੁਰਸ਼ ਸ਼੍ਰੇਣੀ ਵਿੱਚ ਆਯੁਸ਼ ਸ਼ਰਮਾ ਪਹਿਲੇ, ਅਭਿਸ਼ੇਕ ਭਾਰਗਵ ਦੂਜੇ ਅਤੇ ਵੈਭਵ ਕੁਮਾਰ ਤੀਜੇ ਰਹੇ। ਓਪਨ ਮਹਿਲਾ ਸ਼੍ਰੇਣੀ ਵਿੱਚ ਰਪਨੀਤ ਕੌਰ ਪਹਿਲੀ, ਗੁਰਕੋਮਲ ਕੌਰ ਦੂਜੀ ਅਤੇ ਐਂਜਲ ਤੀਜੀ ਰਹੀ। ਜੇਤੂਆਂ ਨੂੰ ਟਰਾਫੀਆਂ ਅਤੇ ਤਮਗਿਆਂ ਨਾਲ ਸਨਮਾਨਿਤ ਕੀਤਾ ਗਿਆ।
ਡਾ. ਰੁਦਰਾ ਨੇ ਸਕੂਲ ਟੀਮ ਦੇ ਮੈਂਬਰਾਂ ਸ਼ਿਪਰਾ ਅਰੋੜਾ, ਦਰਸ਼ਨ ਸਿੰਘ ਸਿੱਧੂ, ਗੁਰਪ੍ਰੀਤ ਸਿੰਘ, ਰੁਸਤਮਪ੍ਰੀਤ ਸਿੰਘ, ਪਲਵਿੰਦਰ ਸਿੰਘ, ਗੌਰਵ, ਕੰਵਰਦੀਪ ਸਿੰਘ, ਮੁਸਕਾਨ, ਵਿਧੀ ਬੰਸਲ ਅਤੇ ਰਿਤੂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਬੱਚਿਆਂ ਵਿੱਚ ਰਚਨਾਤਮਕ ਸੋਚ, ਧੀਰਜ ਅਤੇ ਮਾਨਸਿਕ ਮਜ਼ਬੂਤੀ ਦਾ ਵਿਕਾਸ ਕਰਦੀਆਂ ਹਨ, ਜੋ ਉਨ੍ਹਾਂ ਨੂੰ ਭਵਿੱਖ ਦੀਆਂ ਚੁਣੌਤੀਆਂ ਨਾਲ ਨਿਭਣ ਲਈ ਤਿਆਰ ਕਰਦਾ ਹੈ।
