ਫਿਰੋਜ਼ਪੁਰ ਬਾਰਡਰ ‘ਤੇ ਬੀ.ਐਸ.ਐਫ਼ ਦੀ ਵੱਡੀ ਕਾਰਵਾਈ, 2 ਪਿਸਤੌਲ ਤੇ 1.649 ਕਿਲੋ ਹੈਰੋਇਨ ਬਰਾਮਦ
ਫਿਰੋਜ਼ਪੁਰ ਬਾਰਡਰ ‘ਤੇ ਬੀ.ਐਸ.ਐਫ਼ ਦੀ ਵੱਡੀ ਕਾਰਵਾਈ, 2 ਪਿਸਤੌਲ ਤੇ 1.649 ਕਿਲੋ ਹੈਰੋਇਨ ਬਰਾਮਦ
ਫਿਰੋਜ਼ਪੁਰ, 13 ਅਗਸਤ 2025 (ਅਨੁਜ ਕੱਕੜ ਟੀਨੂੰ)
ਸਰਹੱਦੀ ਇਲਾਕਿਆਂ ਵਿੱਚ ਹਥਿਆਰਾਂ ਅਤੇ ਨਸ਼ੀਲੀ ਵਸਤੂਆਂ ਦੀ ਤਸਕਰੀ ‘ਤੇ ਕੱਸਾ ਪਾਉਂਦਿਆਂ, ਬੀ.ਐਸ.ਐਫ਼ ਦੇ ਚੌਕਸ ਜਵਾਨਾਂ ਨੇ ਫਿਰੋਜ਼ਪੁਰ ਬਾਰਡਰ ‘ਤੇ ਵੱਡੀ ਕਾਮਯਾਬੀ ਹਾਸਲ ਕੀਤੀ ਹੈ। ਇੰਟੈਲੀਜੈਂਸ ਵਿੰਗ ਤੋਂ ਮਿਲੀ ਸਹੀ ਜਾਣਕਾਰੀ ‘ਤੇ ਕਾਰਵਾਈ ਕਰਦਿਆਂ, ਬੀ.ਐਸ.ਐਫ਼ ਨੇ ਪੁਲਿਸ ਇੰਸਪੈਕਟਰ ਗੁਰਵਿੰਦਰ ਕੁਮਾਰ (ਐਸ.ਐਚ.ਓ. ਸਦਰ, ਫਿਰੋਜ਼ਪੁਰ) ਅਤੇ ਏ.ਸੀ. ਬੀ.ਐਸ. ਨੇਗੀ (155 ਬਟਾਲਿਅਨ) ਨਾਲ ਸਾਂਝੀ ਮੁਹਿੰਮ ਚਲਾਈ।
ਇਸ ਦੌਰਾਨ ਪਿੰਡ ਭਾਖੜਾ (ਜ਼ਿਲ੍ਹਾ ਫਿਰੋਜ਼ਪੁਰ) ਨੇੜਲੇ ਇਲਾਕੇ ਵਿੱਚੋਂ 1 ਵੱਡਾ ਪੈਕਟ ਬਰਾਮਦ ਹੋਇਆ, ਜਿਸ ਵਿੱਚੋਂ 2 ਪਿਸਤੌਲ ਅਤੇ 3 ਛੋਟੇ ਪੈਕਟ ਹੈਰੋਇਨ ਦੇ ਮਿਲੇ, ਜਿਨ੍ਹਾਂ ਦਾ ਕੁੱਲ ਭਾਰ 1.649 ਕਿਲੋਗ੍ਰਾਮ ਹੈ। ਵੱਡੇ ਪੈਕਟ ਨੂੰ ਪੀਲੇ ਚਿਪਕਣ ਵਾਲੇ ਟੇਪ ਨਾਲ ਲਪੇਟਿਆ ਗਿਆ ਸੀ ਅਤੇ ਇਸ ‘ਤੇ ਧਾਤ ਦਾ ਛੱਲਾ ਲੱਗਿਆ ਹੋਇਆ ਸੀ।
ਬੀ.ਐਸ.ਐਫ਼ ਨੇ ਕਿਹਾ ਕਿ ਇਹ ਸਫਲਤਾ ਪਾਕਿਸਤਾਨੀ ਤਸਕਰਾਂ ਦੇ ਨਾਪਾਕ ਮਨਸੂਬਿਆਂ ਨੂੰ ਨਾਕਾਮ ਬਣਾਉਣ ਵੱਲ ਇੱਕ ਹੋਰ ਮਜ਼ਬੂਤ ਕਦਮ ਹੈ ਅਤੇ ਇਸ ਨਾਲ ਸਰਹੱਦੀ ਸੁਰੱਖਿਆ ਪ੍ਰਤੀ ਜਵਾਨਾਂ ਦੀ ਪੱਕੀ ਇੱਛਾ ਸਪੱਸ਼ਟ ਹੁੰਦੀ ਹੈ।
