ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਦੇ ਮਾੜੇ ਹਾਲਾਤ ਆਏ ਸਾਹਮਣੇ, ਫਿਰੋਜ਼ਪੁਰ ‘ਚ ਲੋਕ ਹੋਏ ਪਰੇਸ਼ਾਨ

ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਦੇ ਮਾੜੇ ਹਾਲਾਤ ਆਏ ਸਾਹਮਣੇ, ਫਿਰੋਜ਼ਪੁਰ ‘ਚ ਲੋਕ ਹੋਏ ਪਰੇਸ਼ਾਨ

ਫਿਰੋਜ਼ਪੁਰ 9 ਅਪ੍ਰੈਲ 2026 (ਅਨੁਜ ਕੱਕੜ ਟੀਨੂੰ)

ਫਿਰੋਜ਼ਪੁਰ ਵਿੱਚ ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਦੇ ਮਾੜੇ ਹਾਲਾਤ ਇੱਕ ਵਾਰ ਫਿਰ ਸਾਹਮਣੇ ਆਏ ਹਨ। ਅੱਜ ਸ਼ਹਿਰ ਵਿੱਚ ਇੱਕ ਪੰਜਾਬ ਰੋਡਵੇਜ਼ ਦੀ ਬੱਸ ਦੀ ਖ਼ਰਾਬ ਹਾਲਤ ਨੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ।
ਜਾਣਕਾਰੀ ਮੁਤਾਬਕ ਬੱਸ ਦਾ ਬੈਕ ਗੀਅਰ ਨਾ ਚੱਲਣ ਕਰਕੇ ਸਵਾਰੀਆਂ ਅਤੇ ਆਮ ਲੋਕਾਂ ਨੂੰ ਬੱਸ ਨੂੰ ਧੱਕਾ ਲਗਾਉਣਾ ਪਿਆ। ਇਸ ਦੌਰਾਨ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ, ਜੋ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।
ਇਹ ਘਟਨਾ ਫਿਰੋਜ਼ਪੁਰ ਸ਼ਹਿਰ ਦੇ ਬਾਗੀ ਅਤੇ ਜੇਲ ਰੋਡ ਦੇ ਦਰਮਿਆਨ ਵਾਪਰੀ, ਜਿੱਥੇ ਇੱਕ ਕਾਰ ਗਲਤ ਤਰੀਕੇ ਨਾਲ ਪਾਰਕ ਕੀਤੀ ਗਈ ਸੀ। ਇਸ ਕਾਰਨ ਪਿੱਛੋਂ ਆ ਰਹੀ ਪੰਜਾਬ ਰੋਡਵੇਜ਼ ਦੀ ਬੱਸ ਫਸ ਗਈ ਅਤੇ ਸੜਕ ‘ਤੇ ਭਾਰੀ ਜਾਮ ਲੱਗ ਗਿਆ।
ਹਾਲਾਤ ਹੋਰ ਵੀ ਖਰਾਬ ਹੋ ਗਏ ਜਦੋਂ ਬੱਸ ਦਾ ਬੈਕ ਗੀਅਰ ਨਾ ਚੱਲਣ ਕਰਕੇ ਬੱਸ ਪਿੱਛੇ ਨਹੀਂ ਹੋ ਸਕੀ। ਇਸ ਨਾਲ ਸਵਾਰੀਆਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ। ਆਖਿਰਕਾਰ ਸਵਾਰੀਆਂ ਅਤੇ ਬੱਸ ਕੰਡਕਟਰ ਨੇ ਮਿਲ ਕੇ ਕਾਫੀ ਮਿਹਨਤ ਨਾਲ ਬੱਸ ਨੂੰ ਧੱਕਾ ਲਗਾ ਕੇ ਪਿੱਛੇ ਕੀਤਾ, ਜਿਸ ਤੋਂ ਬਾਅਦ ਹੀ ਬੱਸ ਅੱਗੇ ਵਧ ਸਕੀ।
ਇਸ ਮਾਮਲੇ ‘ਚ ਲੋਕਾਂ ਨੇ ਨਾਰਾਜ਼ਗੀ ਜਤਾਈ ਅਤੇ ਕਿਹਾ ਕਿ ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਦੇ ਹਾਲਾਤ ਸੁਧਾਰੇ ਜਾਣ ਚਾਹੀਦੇ ਹਨ ਕਿਉਂਕਿ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨਾਲ ਲੋਕਾਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।