ਫਿਰੋਜ਼ਪੁਰ ਵਿੱਚ 50 ਹੈਕਟੇਅਰ ਰਕਬੇ ’ਚ ਨਵੇਂ ਬਾਗ ਲਗਾਏ ਜਾਣਗੇ : – ਡਿਪਟੀ ਡਾਇਰੈਕਟਰ ਬਾਗਬਾਨੀ
ਫਿਰੋਜ਼ਪੁਰ ਵਿੱਚ 50 ਹੈਕਟੇਅਰ ਰਕਬੇ ’ਚ ਨਵੇਂ ਬਾਗ ਲਗਾਏ ਜਾਣਗੇ : – ਡਿਪਟੀ ਡਾਇਰੈਕਟਰ ਬਾਗਬਾਨੀ
ਫਿਰੋਜ਼ਪੁਰ, 19 ਜੁਲਾਈ 2024 (ਅਨੁਜ ਕੱਕੜ ਟੀਨੂੰ)
ਪੰਜਾਬ ਦੇ ਬਾਗਬਾਨੀ ਮੰਤਰੀ ਸ. ਚੇਤਨ ਸਿੰਘ ਜੋੜਾਮਾਜਰਾ ਦੀ ਰਹਿਨੁਮਾਈ ਹੇਠ ਅਤੇ ਸ੍ਰੀਮਤੀ ਸੈਲਿੰਦਰ ਕੌਰ ਡਾਇਰੈਕਟਰ ਬਾਗਬਾਨੀ ਪੰਜਾਬ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਇਸ ਸਾਲ ਜ਼ਿਲ੍ਹੇ ਵਿੱਚ 50 ਹੈਕਟੇਅਰ ਰਕਬੇ ਵਿੱਚ ਨਵੇਂ ਬਾਗ ਲਗਾਉਣ ਅਤੇ 400 ਟਿਉਬਵੈਲ ਪਲਾਂਟੇਸ਼ਨ ਕਵਰ ਕਰਨ ਦਾ ਟੀਚਾ ਮਿਥਿਆ ਗਿਆ ਹੈ । ਇਹ ਜਾਣਕਾਰੀ ਡਿਪਟੀ ਡਾਇਰੈਕਟਰ ਬਾਗਬਾਨੀ ਡਾ. ਬਲਕਾਰ ਸਿੰਘ ਨੇ ਦਿੱਤੀ।
ਡਿਪਟੀ ਡਾਇਰੈਕਟਰ ਬਾਗਬਾਨੀ ਨੇ ਦੱਸਿਆ ਕਿ ਮਹੀਨਾ ਜੁਲਾਈ-ਅਗਸਤ ਨਵੇਂ ਬਾਗ ਲਗਾਉਣ ਲਈ ਬਹੁਤ ਢੁੱਕਵਾ ਹੈ। ਉਨ੍ਹਾਂ ਦੱਸਿਆ ਕਿ ਬਾਗ ਲਗਾਉਣ ਵਾਸਤੇ ਜ਼ਮੀਨ ਉਪਜਾਓ ਅਤੇ ਚੰਗੇ ਜਲ -ਨਿਕਾਸ ਵਾਲੀ ਹੋਣੀ ਚਾਹੀਂਦੀ ਹੈ। ਬਾਗ ਲਗਾਉਣ ਲਈ ਫਲ ਦੀ ਚੋਣ ਇਲਾਕੇ ਅਨੁਸਾਰ ਅਤੇ ਮਾਹਿਰਾ ਦੀ ਸਲਾਹ ਨਾਲ ਕਰਨੀ ਚਾਹੀਦੀ ਹੈ। ਬੂਟੇ ਲਾਉਣ ਤੋਂ ਪਹਿਲਾਂ ਮਿੱਟੀ ਦੀ ਪਰਖ ਜ਼ਰੂਰ ਕਰਾਉਣੀ ਚਾਹੀਂਦੀ ਹੈ। ਉਨ੍ਹਾਂ ਕਿਹਾ ਕਿ ਸਦਾਬਹਾਰ ਫਲਦਾਰ ਬੂਟੇ ਜਿਵੇ ਕਿ ਨਿੰਬੂ ਜਾਤੀ ਦੇ ਬੂਟੇ, ਲੀਚੀ, ਅਮਰੂਦ, ਪਪੀਤਾ ਮਹੀਨਾ ਫਰਵਰੀ –ਮਾਰਚ ਅਤੇ ਪੱਤਝੜੀ ਫਲਦਾਰ ਬੂਟੇ ਜਿਵੇ ਕਿ ਆੜੂ, ਨਾਸ਼ਪਤੀ , ਅੰਗੂਰ, ਅਲੂਚਾ ਅੱਧ ਜਨਵਰੀ ਤੱਕ ਜਰੂਰ ਲਾ ਦੇਣੇ ਚਾਹੀਦੇ ਹਨ। ਬੂਟੇ ਹਮੇਸਾ ਮੰਜੁਰਸੂਦਾ ਭਰੋਸੇਯੋਗ ਨਰਸਰੀਆਂ ਤੋ ਹੀ ਖਰੀਦਣੇ ਚਾਹੀਦੇ ਹਨ। ਫਲਦਾਰ ਬੂਟੇ ਹਮੇਸਾ 1 ਮੀਟਰ ਡੁੰਘੇ ਅਤੇ ਇਕ ਮੀਟਰ ਘੇਰੇ ਵਾਲੇ ਟੋਏ ਪੁੱਟ ਕੇ ਰੂੜੀ ਦੀ ਖਾਦ ਅਤੇ ਉਪਰਲੀ ਮਿੱਟੀ ਦਾ ਮਿਸ਼ਰਨ ਬਰਾਬਰ ਮਾਤਰਾ ਵਿੱਚ ਭਰ ਕੇ ਲਗਾਉਣ ਨਾਲ ਬੂਟਿਆਂ ਦਾ ਵਾਧਾ ਬਹੁਤ ਜਲਦੀ ਹੁੰਦਾ ਹੈ। ਹਰੇਕ ਟੋਏ ਵਿੱਚ 15 ਮਿਲੀ ਲੀਟਰ ਕਲੋਰੋਪਾਈਰੀਫਾਸ 20 ਈ,ਸੀ, 2 ਕਿਲੋ ਮਿੱਟੀ ਵਿੱਚ ਮਿਲਾ ਕੇ ਸਿਊਕ ਤੋਂ ਬਚਾਉਣ ਲਈ ਜਰੂਰ ਪਾਓ ।
ਉਨ੍ਹਾਂ ਦੱਸਿਆ ਕਿ ਪਾਣੀ ਦੀ ਬਚਤ ਲਈ ਜਿਹੜੇ ਕਿਸਾਨ/ਬਾਗਬਾਨ ਤੁਪਕਾ ਸਿੰਚਾਈ ਪ੍ਰਣਾਲੀ ਨਾਲ ਬਾਗ ਲਗਾਉਣਗੇ ਉਹਨਾਂ ਨੂੰ ਪੰਜਾਬ ਸਰਕਾਰ ਵੱਲੋਂ 10,000 ਹਜ਼ਾਰ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਟਾੱਪਅੱਪ ਵਿੱਤੀ ਸਹਾਇਤਾ ਅਤੇ ਫਲ ਅਤੇ ਸਬਜ਼ੀਆਂ ਦੇ ਮੰਡੀਕਰਨ ਕਰਨ ਲਈ ਪਲਾਸਟਿਕ ਕਰੈਟਸ ਦੀ ਖਰੀਦ ਕਰਨ ਉਪਰ ਵੀ 50 ਪ੍ਰਤੀਸਤ ਵਿੱਤੀ ਸਹਾਇਤਾ ਮੁਹਇਆਂ ਕਰਵਾਈ ਜਾਵੇਗੀ। ਡਿਪਟੀ ਡਾਇਰੈਕਟਰ ਨੇ ਦੱਸਿਆ ਕੇ ਬਾਗਬਾਨੀ ਵਿਭਾਗ ਵੱਲੋ ਕੌਮੀ ਬਾਗਬਾਨੀ ਮਿਸ਼ਨ ਅਧੀਨ ਨਵੇਂ ਬਾਗ ਲਗਾਉਣ, ਵਾਟਰ ਸਟੋਰੈਜ ਟੈਂਕ, ਬੀ-ਕੀਪਿੰਗ , ਬਾਗਬਾਨੀ ਮਸ਼ੀਨਰੀਕਰਨ , ਹਾਈਬਰਿੱਡ ਸਬਜੀ ਬੀਜਾਂ ਦੀ ਕਾਸਤ , ਫੁੱਲਾ ਦੀ ਕਾਸਤ , ਪ੍ਰੌਟੈਕਟਿਡ ਕਲਟੀਵੇਸ਼ਨ , ਖੁੰਬਾ ਦੀ ਕਾਸਤ , ਕੋਲਡ ਸਟੋਰੈਜ ਲਗਾਉਣ ਆਦਿ ਤੇ 25 ਤੋ 50 ਪ੍ਰਤੀਸ਼ਤ ਵਿੱਤੀ ਸਹਾਇਤਾ ਦੇਣ ਦਾ ਉਪਬੰਧ ਕੀਤਾ ਗਿਆ ਹੈ । ਉਨਾਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਬਾਗਬਾਨੀ ਕਿੱਤੇ ਨੂੰ ਅਪਣਾ ਕੇ ਕੁਦਰਤੀ ਸੋਮਿਆਂ ਨੂੰ ਬਚਾਉਣ ਦੇ ਨਾਲ-ਨਾਲ ਆਪਣੀ ਆਮਦਨੀ ਵਿੱਚ ਵਾਧਾ ਕਰ ਸਕਦੇ ਹਨ । ਉਨ੍ਹਾਂ ਕਿਹਾ ਕਿ ਇਸ ਸਬੰਘੀ ਵਧੇਰੇ ਜਾਣਕਾਰੀ ਲਈ ਆਪਣੇ ਨੇੜੇ ਦੇ ਬਲਾਕ ਦਫਤਰ ਜਾਂ ਦਫਤਰ ਡਿਪਟੀ ਡਾਇਰੈਕਟਰ ਬਾਗਬਾਨੀ ਮੋਗਾ ਰੋਡ ਮੱਲਵਾਲ ਫਿਰੋਜ਼ਪੁਰ ਫੋਨ ਨੰਬਰ 98768-90003, 98557-63508 ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।
