ਫਿਰੋਜ਼ਪੁਰ ਨੂੰ ਰੇਲਵੇ ਦੀ ਵੱਡੀ ਸੌਗਾਤ: ਨਵੀਂ ਵੰਦੇ ਭਾਰਤ ਐਕਸਪ੍ਰੈਸ ਤੇ ਗੁਜਰਾਤ ਬੰਦਰਗਾਹਾਂ ਨਾਲ ਸਿੱਧੀ ਕੁਨੈਕਟਿਵਿਟੀ

ਫਿਰੋਜ਼ਪੁਰ ਨੂੰ ਰੇਲਵੇ ਦੀ ਵੱਡੀ ਸੌਗਾਤ: ਨਵੀਂ ਵੰਦੇ ਭਾਰਤ ਐਕਸਪ੍ਰੈਸ ਤੇ ਗੁਜਰਾਤ ਬੰਦਰਗਾਹਾਂ ਨਾਲ ਸਿੱਧੀ ਕੁਨੈਕਟਿਵਿਟੀ

ਫਿਰੋਜ਼ਪੁਰ, 23 ਸਤੰਬਰ 2025 ( ਅਨੁਜ ਕੱਕੜ ਟੀਨੂੰ )

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਪੰਜਾਬ ਲਈ ਰੇਲਵੇ ਵੱਲੋਂ ਇਤਿਹਾਸਕ ਪ੍ਰੋਜੈਕਟਾਂ ਦਾ ਐਲਾਨ ਕੀਤਾ ਗਿਆ ਹੈ। ਇਸ ਵਿੱਚ ਖ਼ਾਸ ਧਿਆਨ ਫਿਰੋਜ਼ਪੁਰ ਤੇ ਸਰਹੱਦੀ ਇਲਾਕਿਆਂ ‘ਤੇ ਦਿੱਤਾ ਗਿਆ ਹੈ।

ਕੇਂਦਰੀ ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਅਤੇ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ ਪੁਸ਼ਟੀ ਕੀਤੀ ਕਿ ਰਾਜਪੁਰਾ–ਮੋਹਾਲੀ ਨਵੀਂ ਰੇਲ ਲਾਈਨ (18 ਕਿਮੀ, ₹443 ਕਰੋੜ) ਨੂੰ ਮਨਜ਼ੂਰੀ ਮਿਲ ਗਈ ਹੈ। ਇਹ 50 ਸਾਲ ਪੁਰਾਣੀ ਮੰਗ ਨੂੰ ਪੂਰਾ ਕਰਦੀ ਹੈ ਅਤੇ ਮਾਲਵਾ ਖੇਤਰ ਨੂੰ ਚੰਡੀਗੜ੍ਹ ਨਾਲ ਸਿੱਧਾ ਜੋੜੇਗੀ। ਇਸ ਨਾਲ ਯਾਤਰਾ ਦੀ ਦੂਰੀ 66 ਕਿਮੀ ਘਟੇਗੀ ਅਤੇ ਰਾਜਪੁਰਾ–ਅੰਬਾਲਾ ਰੂਟ ਦਾ ਬੋਝ ਘਟੇਗਾ।

ਫਿਰੋਜ਼ਪੁਰ ਲਈ ਸਭ ਤੋਂ ਵੱਡੀ ਸੌਗਾਤ ਹੈ ਨਵੀਂ ਵੰਦੇ ਭਾਰਤ ਐਕਸਪ੍ਰੈਸ, ਜੋ ਹੁਣ ਇਸ ਰੂਟ ‘ਤੇ ਚੱਲੇਗੀ:

ਫਿਰੋਜ਼ਪੁਰ ਕੈਂਟ.–ਬਠਿੰਡਾ–ਪਟਿਆਲਾ–ਦਿੱਲੀ (ਹਫ਼ਤੇ ਵਿੱਚ 6 ਦਿਨ, ਯਾਤਰਾ ਸਮਾਂ: 6 ਘੰਟੇ 40 ਮਿੰਟ)। ਇਹ ਪ੍ਰੀਮੀਅਮ ਸੇਵਾ ਸਰਹੱਦੀ ਜ਼ਿਲ੍ਹੇ ਨੂੰ ਸਿੱਧੇ ਰਾਸ਼ਟਰੀ ਰਾਜਧਾਨੀ ਨਾਲ ਜੋੜੇਗੀ, ਜਿਸ ਨਾਲ ਵਪਾਰ, ਸੈਰ-ਸਪਾਟਾ ਅਤੇ ਰੋਜ਼ਗਾਰ ਨੂੰ ਵੱਡਾ ਲਾਭ ਹੋਵੇਗਾ।

ਇਕ ਹੋਰ ਅਹਿਮ ਯੋਜਨਾ ਹੈ ਫਿਰੋਜ਼ਪੁਰ–ਪੱਟੀ ਰੇਲ ਲਾਈਨ, ਜੋ ਪੰਜਾਬ ਦੇ ਸਰਹੱਦੀ ਜ਼ਿਲ੍ਹਿਆਂ ਨੂੰ ਗੁਜਰਾਤ ਬੰਦਰਗਾਹਾਂ ਨਾਲ ਜੋੜੇਗੀ। ਇਸ ਨਾਲ ਆਰਥਿਕ ਕਾਰੀਡੋਰ ਤਿਆਰ ਹੋਵੇਗਾ, ਜਿਸ ਨਾਲ ਉਦਯੋਗਾਂ ਅਤੇ ਖੇਤੀਬਾੜੀ ਨੂੰ ਫ਼ਾਇਦਾ ਤੇ ਲਾਜਿਸਟਿਕਸ ਖਰਚੇ ਘਟਣਗੇ।

ਪੰਜਾਬ ਵਿੱਚ ਰੇਲਵੇ ਨਿਵੇਸ਼ ਵਿੱਚ ਵੱਡਾ ਇਜਾਫ਼ਾ ਹੋਇਆ ਹੈ – 2009–14 ਵਿੱਚ ਜਿੱਥੇ ਸਾਲਾਨਾ ਔਸਤ ਸਿਰਫ਼ ₹225 ਕਰੋੜ ਸੀ, ਉਥੇ 2025–26 ਵਿੱਚ ਇਹ ਵਧ ਕੇ ₹5,421 ਕਰੋੜ ਹੋ ਗਿਆ ਹੈ। 2014 ਤੋਂ ਬਾਅਦ ਪੰਜਾਬ ਵਿੱਚ:

382 ਕਿਮੀ ਨਵੇਂ ਟਰੈਕ ਬਣੇ

1,634 ਕਿਮੀ ਇਲੈਕਟ੍ਰੀਫਿਕੇਸ਼ਨ ਪੂਰੀ – ਪੰਜਾਬ 100% ਇਲੈਕਟ੍ਰੀਫਾਈਡ

409 ਪੁਲ/ਅੰਡਰਬ੍ਰਿਜ਼ ਬਣੇ

ਆਉਣ ਵਾਲੇ ਛਠ੍ਹ ਤੇ ਦੀਵਾਲੀ ਤਿਉਹਾਰਾਂ ਲਈ ਦੇਸ਼ ਭਰ ਵਿੱਚ 12,000 ਖ਼ਾਸ ਟ੍ਰੇਨਾਂ ਚਲਾਈਆਂ ਜਾਣਗੀਆਂ – ਜੋ ਪਿਛਲੇ ਸਾਲ ਨਾਲੋਂ ਰਿਕਾਰਡ ਵਾਧਾ ਹੈ।

ਇਨ੍ਹਾਂ ਯੋਜਨਾਵਾਂ ਨਾਲ ਫਿਰੋਜ਼ਪੁਰ ਮੁੱਖ ਰੇਲਵੇ ਹੱਬ ਵਜੋਂ ਉਭਰੇਗਾ, ਜੋ ਸਰਹੱਦੀ ਇਲਾਕਿਆਂ ਨੂੰ ਦਿੱਲੀ ਤੇ ਵੱਡੇ ਬੰਦਰਗਾਹਾਂ ਨਾਲ ਸਿੱਧਾ ਜੋੜੇਗਾ ਅਤੇ ਕਿਸਾਨਾਂ, ਉਦਯੋਗਾਂ ਤੇ ਨੌਜਵਾਨਾਂ ਲਈ ਨਵੇਂ ਮੌਕੇ ਖੋਲ੍ਹੇਗਾ।