ਸਤੀਏਵਾਲਾ ਸਮਾਰਟ ਸਕੂਲ ਵੱਲੋਂ 6ਵੀਂ ਜਮਾਤ ਦਾ ਵਿਦਿਅਕ-ਧਾਰਮਿਕ ਟੂਰ ਆਯੋਜਿਤ
ਸਤੀਏਵਾਲਾ ਸਮਾਰਟ ਸਕੂਲ ਵੱਲੋਂ 6ਵੀਂ ਜਮਾਤ ਦਾ ਵਿਦਿਅਕ-ਧਾਰਮਿਕ ਟੂਰ ਆਯੋਜਿਤ
ਫਿਰੋਜਪੁਰ 2 ਦਸੰਬਰ 2025 (ਅਨੁਜ ਕੱਕੜ ਟੀਨੂੰ)
ਸਕੂਲ ਸਿੱਖਿਆ ਵਿਭਾਗ ਪੰਜਾਬ ਦੇ ਦਿਸ਼ਾ-ਨਿਰਦੇਸ਼ ਅਧੀਨ ਸਰਕਾਰੀ ਹਾਈ ਸਮਾਰਟ ਸਕੂਲ ਸਤੀਏਵਾਲਾ ਵੱਲੋਂ 6ਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਇੱਕ ਵਿਦਿਅਕ ਤੇ ਧਾਰਮਿਕ ਟੂਰ ਦਾ ਆਯੋਜਨ ਕੀਤਾ ਗਿਆ। ਟੂਰ ਦਾ ਮੁੱਖ ਉਦੇਸ਼ ਬੱਚਿਆਂ ਨੂੰ ਪੰਜਾਬ ਦੇ ਇਤਿਹਾਸ, ਸ਼ਹੀਦਾਂ ਦੀ ਬਹਾਦਰੀ ਅਤੇ ਸਿੱਖ ਧਰਮ ਨਾਲ ਜੋੜਨਾ ਸੀ।
ਟੂਰ ਦੀ ਸ਼ੁਰੂਆਤ ਹੁਸੈਨੀ ਵਾਲਾ ਬਾਰਡਰ ਤੋਂ ਹੋਈ, ਜਿੱਥੇ ਵਿਦਿਆਰਥੀਆਂ ਅਤੇ ਕਲਾਸ ਇੰਚਾਰਜ ਨੇ ਸ਼ਹੀਦੇ ਆਜ਼ਮ ਭਗਤ ਸਿੰਘ, ਸੁਖਦੇਵ ਅਤੇ ਰਾਜਗੁਰੂ ਜੀ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ। ਬੱਚਿਆਂ ਨੂੰ ਉਨ੍ਹਾਂ ਦੀ ਸ਼ਹਾਦਤ, ਬਹਾਦਰੀ ਅਤੇ ਅਜ਼ਾਦੀ ਲਈ ਕੀਤੇ ਯੋਗਦਾਨ ਬਾਰੇ ਵਿਸਥਾਰ ਨਾਲ ਜਾਣੂ ਕਰਵਾਇਆ ਗਿਆ। ਸ਼ਹੀਦੀ ਸਮਾਰਕ ਅਤੇ ਯਾਦਗਾਰ ਦੇ ਦਰਸ਼ਨਾਂ ਦੌਰਾਨ ਬੱਚਿਆਂ ਨੇ ਅਜ਼ਾਦੀ ਸੰਘਰਸ਼ ਨਾਲ ਜੁੜੇ ਇਤਿਹਾਸਕ ਤੱਥਾਂ ਨੂੰ ਨਜ਼ਦੀਕੋਂ ਸਮਝਿਆ।
ਇਸ ਤੋਂ ਬਾਅਦ ਵਿਦਿਆਰਥੀਆਂ ਨੂੰ ਲਾਈਨ ਆਫ ਕੰਟਰੋਲ ਜ਼ੀਰੋ ਪੁਆਇੰਟ ਦੇ ਨੇੜੇ ਲੈ ਜਾਇਆ ਗਿਆ, ਜਿੱਥੇ ਫਲੈਗ ਮਾਰਚ ਹੋਣ ਵਾਲੇ ਸਥਾਨ ਦੀ ਜਾਣਕਾਰੀ ਦਿੱਤੀ ਗਈ। ਨਜ਼ਦੀਕ ਸਥਿਤ ਮਿਊਜ਼ੀਅਮ ਹਾਲ ਵਿੱਚ ਬੀਐਸਐਫ ਜਵਾਨਾਂ ਵੱਲੋਂ ਇਤਿਹਾਸਕ ਪ੍ਰਦਰਸ਼ਨਾਂ ਅਤੇ ਬਾਰਡਰ ਦੀ ਮਹੱਤਤਾ ਬਾਰੇ ਬੱਚਿਆਂ ਨੂੰ ਜਾਣੂ ਕਰਾਇਆ ਗਿਆ।
ਟੂਰ ਦਾ ਅਗਲਾ ਪੜਾਅ ਗੁਰੂਘਰ ਸ੍ਰੀ ਗੁਰੂਦੁਆਰਾ ਜਾਮਨੀ ਸਾਹਿਬ, ਬਜੀਦਪੁਰ ਸੀ। ਇੱਥੇ ਬੱਚਿਆਂ ਨੇ ਸਿੱਖ ਇਤਿਹਾਸ ਨਾਲ ਜੁੜੀਆਂ ਮਹੱਤਵਪੂਰਨ ਜਾਣਕਾਰੀਆਂ ਪ੍ਰਾਪਤ ਕੀਤੀਆਂ। ਸੰਗਤਾਂ ਨਾਲ ਮਿਲਕੇ ਗੁਰੂ ਕਾ ਲੰਗਰ ਗ੍ਰਹਿਣ ਕੀਤਾ ਅਤੇ ਗੁਰਬਾਣੀ ਸੁਣਦਿਆਂ ਆਤਮਕ ਸ਼ਾਂਤੀ ਦਾ ਅਨੁਭਵ ਵੀ ਕੀਤਾ।
ਟੂਰ ਬੱਚਿਆਂ ਲਈ ਗਿਆਨਵਰਧਕ ਅਤੇ ਰੋਮਾਂਚਕ ਰਿਹਾ। ਵਿਦਿਆਰਥੀਆਂ ਨੇ ਟੂਰ ਦਾ ਖੂਬ ਆਨੰਦ ਲਿਆ ਅਤੇ ਇਤਿਹਾਸ ਤੇ ਧਾਰਮਿਕ ਸਥਾਨਾਂ ਬਾਰੇ ਨਵਾਂ ਗਿਆਨ ਪ੍ਰਾਪਤ ਕੀਤਾ।
