ਟਰੱਕ ਮਾਲਕ ਵੱਲੋਂ RTA ‘ਤੇ ਰਿਸ਼ਵਤ ਮੰਗਣ ਦੇ ਦੋਸ਼, ਆਰਟੀਏ ਨੇ ਕਿਹਾ—ਕਾਰਵਾਈ ਨਿਯਮਾਂ ਅਨੁਸਾਰ
ਟਰੱਕ ਮਾਲਕ ਵੱਲੋਂ RTA ‘ਤੇ ਰਿਸ਼ਵਤ ਮੰਗਣ ਦੇ ਦੋਸ਼, ਆਰਟੀਏ ਨੇ ਕਿਹਾ—ਕਾਰਵਾਈ ਨਿਯਮਾਂ ਅਨੁਸਾਰ
ਫਿਰੋਜ਼ਪੁਰ 25 ਮਾਰਚ 2026 (ਅਨੁਜ ਕੱਕੜ ਟੀਨੂੰ)
ਫਿਰੋਜ਼ਪੁਰ ਦੇ ਮੱਖੂ ਇਲਾਕੇ ਵਿੱਚ ਆਰਟੀਏ ਚੈਕਿੰਗ ਦੌਰਾਨ ਇੱਕ ਮਾਮਲਾ ਵੱਡੇ ਵਿਵਾਦ ਵਿੱਚ ਤਬਦੀਲ ਹੋ ਗਿਆ ਹੈ। ਇੱਕ ਪਾਸੇ ਟਰੱਕ ਮਾਲਕ ਅੰਗਰੇਜ਼ ਸਿੰਘ ਨੇ ਆਰਟੀਏ ਅਧਿਕਾਰੀਆਂ ‘ਤੇ ਰਿਸ਼ਵਤ ਮੰਗਣ ਦੇ ਦੋਸ਼ ਲਗਾਏ ਹਨ, ਜਦਕਿ ਦੂਜੇ ਪਾਸੇ ਵਿਭਾਗ ਨੇ ਇਹਨਾਂ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਰੱਦ ਕਰ ਦਿੱਤਾ ਹੈ।
ਪ੍ਰੈਸ ਕਾਨਫਰੰਸ ਕਰਦਿਆਂ ਅੰਗਰੇਜ਼ ਸਿੰਘ ਨੇ ਦੱਸਿਆ ਕਿ 22 ਮਾਰਚ ਨੂੰ ਮੱਖੂ ਵਿਖੇ ਚੈਕਿੰਗ ਦੌਰਾਨ ਉਸਦਾ ਟਰੱਕ ਰੋਕਿਆ ਗਿਆ, ਜਿਸਨੂੰ ਡਰਾਈਵਰ ਮਲੂਕਾ ਸਿੰਘ ਚਲਾ ਰਿਹਾ ਸੀ। ਉਹਨਾਂ ਦਾ ਕਹਿਣਾ ਹੈ ਕਿ ਸਾਰੇ ਕਾਗਜ਼ ਪੂਰੇ ਹੋਣ ਦੇ ਬਾਵਜੂਦ ਟੀਮ ਵੱਲੋਂ 20 ਹਜ਼ਾਰ ਰੁਪਏ ਦੀ ਮੰਗ ਕੀਤੀ ਗਈ। ਰਕਮ ਨਾ ਦੇਣ ‘ਤੇ 29 ਹਜ਼ਾਰ ਰੁਪਏ ਦਾ ਓਵਰਲੋਡਿੰਗ ਚਲਾਨ ਕਰ ਦਿੱਤਾ ਗਿਆ।
ਟਰੱਕ ਮਾਲਕ ਦਾ ਦਾਅਵਾ ਹੈ ਕਿ ਬਾਅਦ ਵਿੱਚ ਕਰਵਾਏ ਗਏ ਵਜ਼ਨ ਵਿੱਚ ਟਰੱਕ ਓਵਰਲੋਡ ਨਹੀਂ ਨਿਕਲਿਆ। ਉਹਨਾਂ ਇਹ ਵੀ ਆਰੋਪ ਲਗਾਇਆ ਕਿ ਵਿਰੋਧ ਕਰਨ ‘ਤੇ ਉਹਨਾਂ ਖ਼ਿਲਾਫ਼ ਝੂਠੀ ਸ਼ਿਕਾਇਤ ਵੀ ਦਰਜ ਕਰਵਾਈ ਗਈ।
ਉਧਰ, ਆਰਟੀਏ ਅਧਿਕਾਰੀ ਤੁਸ਼ੀਤਾ ਗੁਲਾਟੀ ਨੇ ਸਪਸ਼ਟ ਕੀਤਾ ਕਿ ਨਾਕੇ ਦੌਰਾਨ ਟਰੱਕ ਓਵਰਲੋਡ ਮਿਲਿਆ ਸੀ, ਜਿਸ ਕਰਕੇ ਨਿਯਮਾਂ ਮੁਤਾਬਕ ਚਲਾਨ ਕੀਤਾ ਗਿਆ। ਉਹਨਾਂ ਦੱਸਿਆ ਕਿ ਚਲਾਨ ਤੋਂ ਬਾਅਦ ਡਰਾਈਵਰ ਮੌਕੇ ਤੋਂ ਭੱਜ ਗਿਆ ਸੀ, ਜਿਸ ਨਾਲ ਸ਼ੱਕ ਹੋਰ ਵੱਧ ਗਿਆ।
ਅਧਿਕਾਰੀ ਨੇ ਇਹ ਵੀ ਕਿਹਾ ਕਿ ਜੇ ਵਾਹਨ ਓਵਰਲੋਡ ਨਾ ਹੁੰਦਾ ਤਾਂ ਮੌਕੇ ‘ਤੇ ਹੀ ਤੋਲ ਕਰਵਾ ਲਈ ਜਾਂਦੀ। ਨਾਲ ਹੀ ਉਹਨਾਂ ਦੱਸਿਆ ਕਿ ਟੀਮ ਦੇ ਮੈਂਬਰ ਨੂੰ ਫੋਨ ‘ਤੇ ਧਮਕੀ ਮਿਲਣ ਦੇ ਮਾਮਲੇ ਵਿੱਚ 112 ‘ਤੇ ਸ਼ਿਕਾਇਤ ਵੀ ਦਰਜ ਕਰਵਾਈ ਗਈ ਹੈ।
ਇਸ ਸਾਰੇ ਮਾਮਲੇ ਨੇ ਹੁਣ ਗੰਭੀਰ ਰੂਪ ਧਾਰ ਲਿਆ ਹੈ। ਦੋਵੇਂ ਪੱਖ ਆਪਣੇ-ਆਪਣੇ ਦਾਅਵਿਆਂ ‘ਤੇ ਡਟੇ ਹੋਏ ਹਨ, ਜਦਕਿ ਲੋਕ ਨਿਰਪੱਖ ਜਾਂਚ ਦੀ ਮੰਗ ਕਰ ਰਹੇ ਹਨ।
