ਨਸ਼ਾ ਮਾਫ਼ੀਆ ਦੀਆਂ ਨਜ਼ਰਾਂ ਹੁਣ ਨਾਬਾਲਿਗਾਂ ‘ਤੇ: ਫ਼ਿਰੋਜ਼ਪੁਰ ‘ਚ ANTF ਵੱਲੋਂ ਵੱਡੀ ਕਾਰਵਾਈ,ਹੈਰੋਇਨ ਸਣੇ ਇੱਕ ਨਾਬਾਲਿਗ ਤੇ ਸਾਥੀ ਗ੍ਰਿਫ਼ਤਾਰ
ਨਸ਼ਿਆਂ ਦੇ ਧੰਦੇ ‘ਚ ਵਰਤਿਆ ਜਾ ਰਿਹਾ ਬਚਪਨ
ਨਸ਼ਾ ਮਾਫ਼ੀਆ ਦੀਆਂ ਨਜ਼ਰਾਂ ਹੁਣ ਨਾਬਾਲਿਗਾਂ ‘ਤੇ: ਫ਼ਿਰੋਜ਼ਪੁਰ ‘ਚ ANTF ਵੱਲੋਂ ਵੱਡੀ ਕਾਰਵਾਈ,ਹੈਰੋਇਨ ਸਣੇ ਇੱਕ ਨਾਬਾਲਿਗ ਤੇ ਸਾਥੀ ਗ੍ਰਿਫ਼ਤਾਰ
ਫ਼ਿਰੋਜ਼ਪੁਰ 30 ਦਸੰਬਰ 2025 (ਅਨੁਜ ਕੱਕੜ ਟੀਨੂੰ)
ਪੰਜਾਬ ਵਿੱਚ ਨਸ਼ਿਆਂ ਵਿਰੁੱਧ ਵਿੱਢੀ ਮੁਹਿੰਮ ‘ਯੁੱਧ ਨਸ਼ਿਆਂ ਵਿਰੁੱਧ’ ਦੇ ਤਹਿਤ ਐਂਟੀ ਨਾਰਕੋਟਿਕਸ ਟਾਸਕ ਫੋਰਸ (ANTF) ਨੂੰ ਇੱਕ ਵੱਡੀ ਸਫਲਤਾ ਹਾਸਲ ਹੋਈ ਹੈ। ਏਆਈਜੀ ਗੁਰਿੰਦਰ ਬੀਰ ਸਿੰਘ (ANTF ਫ਼ਿਰੋਜ਼ਪੁਰ ਰੇਂਜ) ਦੀ ਅਗਵਾਈ ਹੇਠਲੀ ਟੀਮ ਨੇ ਦੋ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ ਕੋਲੋਂ 505 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ ਹੈ। ਚਿੰਤਾ ਵਾਲੀ ਗੱਲ ਇਹ ਹੈ ਕਿ ਫੜੇ ਗਏ ਮੁਲਜ਼ਮਾਂ ਵਿੱਚੋਂ ਇੱਕ ਨਾਬਾਲਿਗ (ਜੁਵੇਨਾਈਲ) ਹੈ।
ਮਿਲੀ ਜਾਣਕਾਰੀ ਅਨੁਸਾਰ, ਏ.ਐਨ.ਟੀ.ਐਫ. ਦੀ ਟੀਮ ਨੂੰ ਮੁਖ਼ਬਰ ਖ਼ਾਸ ਤੋਂ ਸੂਚਨਾ ਮਿਲੀ ਸੀ ਕਿ ਫ਼ਿਰੋਜ਼ਪੁਰ ਛਾਉਣੀ ਇਲਾਕੇ ਵਿੱਚ ਕੁਝ ਲੋਕ ਨਸ਼ਾ ਤਸਕਰੀ ਦਾ ਧੰਦਾ ਕਰ ਰਹੇ ਹਨ। ਸੂਚਨਾ ਦੇ ਆਧਾਰ ‘ਤੇ ਤੁਰੰਤ ਕਾਰਵਾਈ ਕਰਦਿਆਂ ਟੀਮ ਨੇ ਛਾਪੇਮਾਰੀ ਕੀਤੀ ਅਤੇ ਦੋ ਆਰੋਪੀਆਂ ਨੂੰ ਮੌਕੇ ‘ਤੇ ਕਾਬੂ ਕਰ ਲਿਆ। ਤਲਾਸ਼ੀ ਦੌਰਾਨ ਉਨ੍ਹਾਂ ਕੋਲੋਂ 500 ਗ੍ਰਾਮ ਤੋਂ ਵੱਧ ਹੈਰੋਇਨ ਬਰਾਮਦ ਹੋਈ। ਆਰੋਪੀਆਂ ਦੀ ਪਛਾਣ ਗੁਰਪ੍ਰੀਤ ਸਿੰਘ ਪੁੱਤਰ ਚਾਨਣ ਸਿੰਘ, ਵਾਸੀ ਪਿੰਡ ਬੀੜ ਤਲਾਬ (ਬਠਿੰਡਾ) ਅਤੇ ਦੂਸਰਾ ਆਰੋਪੀ ਨਾਬਾਲਿਗ ਜਿਸ ਦੀ ਉਮਰ 18 ਸਾਲ ਤੋਂ ਘੱਟ ਹੈ। ਜੋਬਨਪ੍ਰੀਤ ਸਿੰਘ ਪੁੱਤਰ ਫੁਮਨ ਸਿੰਘ, ਵਾਸੀ ਪਿੰਡ ਲਖਮੀਰਪੁਰਾ (ਮਮਦੋਟ), ਜਿਸ ਨੂੰ ਤਫ਼ਤੀਸ਼ ਦੌਰਾਨ ਮਾਮਲੇ ਵਿੱਚ ਨਾਮਜ਼ਦ ਕਰਕੇ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਨੇ ਆਰੋਪੀਆਂ ਖ਼ਿਲਾਫ਼ NDPS ਐਕਟ ਦੀਆਂ ਧਾਰਾਵਾਂ 21 ਅਤੇ 29 ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਅਗਲੀ ਪੁੱਛਗਿੱਛ ਜਾਰੀ ਹੈ।
ਸਮਾਜ ਲਈ ਗੰਭੀਰ ਚਿੰਤਾ: ਕਿਉਂ ਨਿਸ਼ਾਨੇ ‘ਤੇ ਹਨ ਬੱਚੇ?
ਇਸ ਘਟਨਾ ਨੇ ਇੱਕ ਵਾਰ ਫਿਰ ਸਾਬਤ ਕਰ ਦਿੱਤਾ ਹੈ ਕਿ ਨਸ਼ਾ ਮਾਫ਼ੀਆ ਹੁਣ ਮਾਸੂਮ ਬੱਚਿਆਂ ਨੂੰ ਆਪਣਾ ਹਥਿਆਰ ਬਣਾ ਰਿਹਾ ਹੈ। ਨਾਬਾਲਿਗ ਉਮਰ ਦੇ ਬੱਚਿਆਂ ਦਾ ਨਸ਼ਿਆਂ ਦੇ ਸੌਦਾਗਰ ਬਣਨਾ ਅੱਜ ਦੇ ਸਮਾਜ ਲਈ ਇੱਕ ਵੱਡੀ ਅਤੇ ਗੰਭੀਰ ਚੁਣੌਤੀ ਬਣ ਕੇ ਸਾਹਮਣੇ ਆ ਰਿਹਾ ਹੈ। ਗਰੀਬੀ, ਬੇਰੁਜ਼ਗਾਰੀ, ਪਰਿਵਾਰਕ ਤਣਾਅ ਅਤੇ ਸਮਾਜਿਕ ਅਸਮਾਨਤਾਵਾਂ ਕਾਰਨ ਕਈ ਬੱਚੇ ਛੋਟੀ ਉਮਰ ਵਿੱਚ ਹੀ ਪੈਸਾ ਕਮਾਉਣ ਦੇ ਆਸਾਨ ਰਸਤੇ ਲੱਭਣ ਲੱਗ ਪੈਂਦੇ ਹਨ। ਨਸ਼ਾ ਮਾਫ਼ੀਆ ਇਸ ਕਮਜ਼ੋਰੀ ਦਾ ਫਾਇਦਾ ਚੁੱਕਦਿਆਂ ਨਾਬਾਲਿਗ ਬੱਚਿਆਂ ਨੂੰ ਨਸ਼ਾ ਤਸਕਰੀ ਲਈ ਵਰਤ ਰਹੀ ਹੈ।
ਗਲਤ ਸੰਗਤ, ਬੁਰੇ ਦੋਸਤ, ਸੋਸ਼ਲ ਮੀਡੀਆ ,ਗਾਣੇ ਅਤੇ ਫ਼ਿਲਮਾਂ ਵਿੱਚ ਨਸ਼ਿਆਂ ਨੂੰ ਫੈਸ਼ਨ ਜਾਂ ਤਾਕਤ ਵਜੋਂ ਦਿਖਾਉਣਾ ਨੌਜਵਾਨ ਮਨਾਂ ‘ਤੇ ਨੇਗਟਿਵ ( ਨਕਾਰਾਤਮਕ ) ਅਸਰ ਪਾ ਰਿਹਾ ਹੈ। ਪਰਿਵਾਰਕ ਲਾਪਰਵਾਹੀ, ਮਾਪਿਆਂ ਵੱਲੋਂ ਸਮੇਂ ਦੀ ਘਾਟ ਅਤੇ ਸਕੂਲ ਪੱਧਰ ‘ਤੇ ਜਾਗਰੂਕਤਾ ਦੀ ਕਮੀ ਇਸ ਸਮੱਸਿਆ ਨੂੰ ਹੋਰ ਗੰਭੀਰ ਬਣਾ ਰਹੀ ਹੈ। ਜਦ ਕਿ ਮਾਪਿਆਂ ਨੂੰ ਵੀ ਆਪਣੇ ਬੱਚਿਆਂ ਦਾ ਪੂਰਾ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਉਹ ਕਿ ਕਰ ਰਹੇ ਹਨ , ਕਿਥੇ ਜਾ ਰਹੇ ਹਨ ਅਤੇ ਓਹਨਾ ਦੀ ਸੰਗਤ ਕਿਦਾਂ ਦੀ ਹੈ। ਆਏ ਦਿਨ ਪੁਲਿਸ ਵੱਲੋਂ ਨਸ਼ਾ ਤਸਕਰਾਂ ਦੀਆਂ ਗਿਰਫ਼ਤਾਰੀਆਂ ਕੀਤੀਆਂ ਜਾ ਰਹੀਆਂ ਹਨ, ਪਰ ਚਿੰਤਾ ਦੀ ਗੱਲ ਇਹ ਹੈ ਕਿ ਇਨ੍ਹਾਂ ਮਾਮਲਿਆਂ ਵਿੱਚ ਨਾਬਾਲਿਗ ਲੜਕੇ ਵੀ ਸ਼ਾਮਿਲ ਪਾਏ ਜਾ ਰਹੇ ਹਨ।
