ਫਿਰੋਜ਼ਪੁਰ ’ਚ ਚੋਰ ਬੇਖੌਫ਼, ਦੁਰਗਾ ਦਾਸ ਬਾਜ਼ਾਰ ਦੀ ਇੱਕ ਦੁਕਾਨ ਤੋਂ ਨਗਦੀ ਤੇ ਸਮਾਨ ਲੈ ਕੇ ਫਰਾਰ

ਫਿਰੋਜ਼ਪੁਰ ’ਚ ਚੋਰ ਬੇਖੌਫ਼, ਦੁਰਗਾ ਦਾਸ ਬਾਜ਼ਾਰ ਦੀ ਇੱਕ ਦੁਕਾਨ ਤੋਂ ਨਗਦੀ ਤੇ ਸਮਾਨ ਲੈ ਕੇ ਫਰਾਰ

ਫਿਰੋਜ਼ਪੁਰ 29 ਜਨਵਰੀ 2026 (ਸਿਟੀਜਨਜ਼ ਵੋਇਸ)

ਸ਼ਹਿਰ ਦੇ ਪ੍ਰਸਿੱਧ ਦੁਰਗਾ ਦਾਸ ਬਾਜ਼ਾਰ ਤੋਂ ਤਾਜ਼ਾ ਮਾਮਲਾ ਬੀਤੀ ਸਵੇਰ ਤਕਰੀਬਨ ਤਿੰਨ ਵਜੇ ਦੇ ਕਰੀਬ ਦਾ ਸਾਹਮਣੇ ਆਇਆ ਹੈ, ਜਿੱਥੇ ਅਣਪਛਾਤੇ ਚੋਰਾਂ ਵੱਲੋਂ ਇੱਕ ਦੁਕਾਨ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਚੋਰਾਂ ਨੇ ਦੁਕਾਨ ਵਿੱਚੋਂ ਨਗਦੀ ਦੇ ਨਾਲ-ਨਾਲ ਖਾਣ-ਪੀਣ ਦਾ ਸਮਾਨ, ਜਿਵੇਂ ਕਿ ਡਰਾਈ ਫਰੂਟ, ਘਿਓ ਦੇ ਪੀਪੇ ਆਦਿ ਲੁੱਟ ਲਏ। ਦੁਕਾਨਦਾਰ ਦੇ ਦੱਸਣ ਮੁਤਾਬਕ ਚੋਰ ਉਹਨਾਂ ਦਾ ਪੁਰਾਣਾ ਗਲਾ ਵੀ ਨਾਲ ਲੈ ਗਏ, ਜਿਸ ਦਾ ਵਜ਼ਨ ਤਕਰੀਬਨ 40 ਤੋਂ 45 ਕਿਲੋ ਦੇ ਵਿਚਕਾਰ ਸੀ। ਇਸ ਗਲੇ ਵਿੱਚ ਦੁਕਾਨ ਨਾਲ ਸਬੰਧਤ ਕਈ ਜਰੂਰੀ ਕਾਗਜ਼ਾਤ ਵੀ ਮੌਜੂਦ ਸਨ।
ਲਗਾਤਾਰ ਹੋ ਰਹੀਆਂ ਚੋਰੀਆਂ ਕਾਰਨ ਦੁਕਾਨਦਾਰਾਂ ਵਿੱਚ ਭਾਰੀ ਰੋਸ ਅਤੇ ਡਰ ਦਾ ਮਾਹੌਲ ਬਣਿਆ ਹੋਇਆ ਹੈ। ਦੁਕਾਨਦਾਰਾਂ ਦਾ ਕਹਿਣਾ ਹੈ ਕਿ ਪ੍ਰਸ਼ਾਸਨ ਦੀ ਢਿੱਲੀ ਕਾਰਗੁਜ਼ਾਰੀ ਕਾਰਨ ਉਹਨਾਂ ਦੀ ਰਾਤਾਂ ਦੀ ਨੀਂਦ ਹਰਾਮ ਹੋ ਚੁੱਕੀ ਹੈ ਅਤੇ ਹਰ ਸਵੇਰ ਦੁਕਾਨਾਂ ਦੇ ਸ਼ਟਰ ਖੋਲ੍ਹਦੇ ਸਮੇਂ ਡਰ ਲੱਗਦਾ ਹੈ ਕਿ ਕਿਤੇ ਸ਼ਟਰ ਟੁੱਟੇ ਨਾ ਮਿਲਣ।
ਮਾਮਲੇ ਦੀ ਜਾਣਕਾਰੀ ਮਿਲਦਿਆਂ ਹੀ ਪੁਲਿਸ ਮੌਕੇ ’ਤੇ ਪਹੁੰਚ ਗਈ ਅਤੇ ਆਪਣੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਵੱਲੋਂ ਚੋਰਾਂ ਨੂੰ ਜਲਦ ਗਿਰਫ਼ਤਾਰ ਕਰਨ ਦਾ ਭਰੋਸਾ ਦਿੱਤਾ ਗਿਆ ਹੈ। ਦੂਜੇ ਪਾਸੇ ਦੁਕਾਨਦਾਰਾਂ ਨੇ ਪ੍ਰਸ਼ਾਸਨ ਤੋਂ ਗੁਹਾਰ ਲਗਾਈ ਹੈ ਕਿ ਚੋਰੀਆਂ ’ਤੇ ਤੁਰੰਤ ਨੱਥ ਪਾਇਆ ਜਾਵੇ ਅਤੇ ਫਿਰੋਜ਼ਪੁਰ ਨੂੰ ਚੋਰ ਮੁਕਤ ਬਣਾਇਆ ਜਾਵੇ।