ਸ਼ਰਾਬ ਫੈਕਟਰੀ ਮਨਸੂਰਵਾਲ ਦੇ ਸਾਹਮਣੇ ਪ੍ਰਦਰਸ਼ਨ ਕਾਰੀਆਂ ਦਾ ਧਰਨਾ ਜਾਰੀ, ਪੁਲਸ ਅਤੇ ਉਗਰਾਹਾਂ ਜਥੇਬੰਦੀ ਹੋਈ ਆਹਮੋਸਾਹਮਣੇ, ਪੁਲਸ ਦੇ ਬੈਰੀਕੇਡ ਤੋੜੇ।
- 86 Views
- kakkar.news
- December 19, 2022
- Agriculture Punjab
ਸ਼ਰਾਬ ਫੈਕਟਰੀ ਮਨਸੂਰਵਾਲ ਦੇ ਸਾਹਮਣੇ ਪ੍ਰਦਰਸ਼ਨ ਕਾਰੀਆਂ ਦਾ ਧਰਨਾ ਜਾਰੀ, ਪੁਲਸ ਅਤੇ ਉਗਰਾਹਾਂ ਜਥੇਬੰਦੀ ਹੋਈ ਆਹਮੋਸਾਹਮਣੇ, ਪੁਲਸ ਦੇ ਬੈਰੀਕੇਡ ਤੋੜੇ।
ਤਲਵੰਡੀ ਭਾਈ19 ਦਸੰਬਰ 2022 (ਸਿਟੀਜ਼ਨਜ਼ ਵੋਇਸ)
ਸ਼ਰਾਬ ਫੈਕਟਰੀ ਮੈਲਬਰੋਜ ਪਿੰਡ ਮਨਸੂਰ ਵਾਲ ਵਿੱਚ ਪਿਛਲੇ ਪੰਜ ਮਹੀਨਿਆਂ ਤੋਂ ਵਾਦ ਵਿਵਾਦ ਚੱਲ ਰਿਹਾ ਹੈ। ਫੈਕਟਰੀ ਬੰਦ ਕਰਵਾਉਣ ਨੂੰ ਲੈ ਕੇ ਆਸ ਪਾਸ ਦੇ ਪਿਡਾਂ ਦੇ ਲੋਕ ਫੈਕਟਰੀ ਅੱਗੇ ਧਰਨਾ ਲਗਾ ਕੇ ਬੈਠੇ ਹੋਏ ਹਨ। ਪਰ ਪਿਛਲੇ ਕੁੱਝ ਦਿਨਾਂ ਤੋਂ ਪੁਲਸ ਵੱਲੋਂ ਫੈਕਟਰੀ ਦੇ ਮੂਹਰੇ ਤੋਂ ਧਰਨਾ ਚਕਵਾਉਣ ਲਈ ਪ੍ਰਦਰਸ਼ਨ ਕਾਰੀਆਂ ਤੇ ਦਬਾਅ ਬਨਾਇਆ ਜਾ ਰਿਹਾ ਹੈ। ਪਰ ਇਸ ਦਬਾਅ ਦੇ ਚਲਦਿਆਂ ਹੁਣ ਇਸ ਸੰਘਰਸ਼ ਨੂੰ ਕਿਸਾਨ ਜਥੇਬੰਦੀਆਂ ਨੇ ਵੀ ਹਿਮਾਇਤ ਦੇਣੀ ਸ਼ੁਰੂ ਕਰ ਦਿੱਤੀ ਹੈ। ਅੱਜ ਵੱਡੀ ਗਿੱਣਤੀ ਵਿੱਚ ਉਗਰਾਹਾਂ ਗਰੁੱਪ ਦੇ ਕਿਸਾਨ ਫੈਕਟਰੀ ਸਾਹਮਣੇ ਲੱਗੇ ਧਰਨੇ ਵਿੱਚ ਸ਼ਾਮਿਲ ਹੋਏ। ਇਸ ਤੋਂ ਪਹਿਲਾਂ ਜਦੋਂ ਇਹ ਕਿਸਾਨ ਪਿੰਡ ਮਨਸੂਰ ਵਾਲ ਪੁੱਜੇ ਤਾਂ ਵੱਡੀ ਗਿਣਤੀ ਵਿੱਚ ਤੈਨਾਤ ਪੁਲਿਸ ਨੇ ਇਨ੍ਹਾਂ ਨੂੰ ਧਰਨੇ ਵਾਲੀ ਥਾਂ ਤੋਂ ਤੋ ਪਹਿਲਾਂ ਹੀ ਰੋਕ ਦਿਤਾ। ਜਿੱਥੇ ਇਨ੍ਹਾਂ ਦਾ ਟਕਰਾਅ ਪੁਲਸ ਨਾਲ ਹੋ ਗਿਆ। ਇਨ੍ਹਾਂ ਕਿਸਾਨਾਂ ਦੇ ਰੋਹ ਅੱਗੇ ਪੁਲਸ ਦੇ ਸਾਰੇ ਯਤਨ ਫੇਲ੍ਹ ਹੋ ਗਏ ਅਤੇ ਇਹ ਕਿਸਾਨ ਪੁਲਸ ਦੇ ਸਾਰੇ ਬੈਰੀਕੇਡ ਤੋੜਦੇ ਹੋਏ ਧਰਨੇ ਵਾਲੀ ਥਾਂ ਤੇ ਪੁੱਜੇ। ਕਿਸਾਨ ਆਗੂਆਂ ਦਾ ਕਹਿਣਾ ਸੀ ਕਿ ਇਹ ਫੈਕਟਰੀ ਲੋਕਾਂ ਲਈ ਮੌਤ ਵੰਡ ਰਹੀ ਹੈ ਇਸ ਲਈ ਜਿੰਨੀ ਦੇਰ ਤੱਕ ਇਸ ਨੂੰ ਬੰਦ ਨਹੀਂ ਕੀਤਾ ਜਾਂਦਾ ਉਨ੍ਹੀ ਦੇਰ ਤੱਕ ਧਰਨਾ ਜਾਰੀ ਰੱਖਿਆ ਜਾਵੇਗਾ।
ਕਿਸਾਨਾਂ ਦੇ ਕਾਫ਼ਲੇ ਤੋਂ ਪਹਿਲਾਂ ਐਸਐਸਪੀ ਫਿਰੋਜ਼ਪੁਰ ਕੰਵਰਦੀਪ ਕੌਰ ਨੇ ਪ੍ਰੈਸ ਕਾਨਫਰੰਸ ਕਰਦਿਆਂ ਕਿਹਾ ਕਿ, ਬੀਤੇ ਕੱਲ੍ਹ ਪੁਲਿਸ ਦੀਆਂ ਗੱਡੀਆਂ ਰੋਕਣ ਵਾਲੇ 46 ਲੋਕਾਂ ਨੂੰ ਗ੍ਰਿਫਤਾਰ ਕਰਕੇ, ਤਿੰਨ ਵੱਖ ਵੱਖ ਮਾਮਲੇ ਦਰਜ ਕੀਤੇ ਗਏ ਹਨ।
ਐਸਐਸਪੀ ਨੇ ਦਾਅਵਾ ਕਰਦਿਆਂ ਹੋਇਆ ਕਿਹਾ ਕਿ, ਕਿਸਾਨਾਂ ਤੇ ਆਮ ਲੋਕਾਂ ਨੂੰ ਧਰਨੇ ਵਿਚ ਪੁੱਜਣ ਤੋਂ ਨਹੀਂ ਰੋਕਿਆ ਜਾ ਰਿਹਾ। ਹਾਈਕੋਰਟ ਦੇ ਹੁਕਮਾਂ ਮੁਤਾਬਿਕ, 300 ਮੀਟਰ ਦੂਰ ਧਰਨਾ ਕਰਵਾ ਕੇ, ਫ਼ੈਕਟਰੀ ਦੇ ਇੱਕ ਗੇਟ ਨੂੰ ਖੁੱਲ੍ਹਵਾ ਦਿੱਤਾ ਗਿਆ ਹੈ।
ਐਸਐਸਪੀ ਕੰਵਰਦੀਪ ਕੌਰ ਨੇ ਇਹ ਵੀ ਦਾਅਵਾ ਕਰਦਿਆਂ ਹੋਇਆ ਕਿਹਾ ਕਿ, ਬੀਤੇ ਕੱਲ੍ਹ ਕਿਸਾਨਾਂ ਨੂੰ ਸਿਰਫ਼ ਗ੍ਰਿਫਤਾਰ ਕੀਤਾ ਗਿਆ, ਕਿਸੇ ਤੇ ਵੀ ਲਾਠੀਚਾਰਜ ਨਹੀਂ ਕੀਤਾ ਗਿਆ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ, ਉਹ ਅਫ਼ਵਾਹਾਂ ਤੇ ਯਕੀਨ ਨਾ ਕਰਨ। ਹਾਲਾਂਕਿ ਸ਼ਰਾਬ ਫ਼ੈਕਟਰੀ ਸਾਹਮਣੇ ਧਰਨਾ ਮਾਰੀ ਬੈਠੇ ਲੋਕਾਂ ਨੇ ਕਿਹਾ ਕਿ, ਪੁਲਿਸ ਨੇ ਲਾਠੀਚਾਰਜ ਕਰਕੇ, ਕਈਆਂ ਨੂੰ ਗ੍ਰਿਫਤਾਰ ਕੀਤਾ ਸੀ।