ਸਾਲ 2023-24 ਦੌਰਾਨ ਬਕਾਇਆ ਖੇਤੀ ਮਸ਼ੀਨਾਂ ਦੀ ਸਬਸਿਡੀ ਲੈਣ ਲਈ ਵੈਰੀਫਿਕੇਸ਼ਨ 26 ਜੁਲਾਈ 2024 ਨੂੰ – ਡਾ. ਜੰਗੀਰ ਸਿੰਘ
- 48 Views
- kakkar.news
- July 24, 2024
- Punjab
ਸਾਲ 2023-24 ਦੌਰਾਨ ਬਕਾਇਆ ਖੇਤੀ ਮਸ਼ੀਨਾਂ ਦੀ ਸਬਸਿਡੀ ਲੈਣ ਲਈ ਵੈਰੀਫਿਕੇਸ਼ਨ 26 ਜੁਲਾਈ 2024 ਨੂੰ – ਡਾ. ਜੰਗੀਰ ਸਿੰਘ
ਫ਼ਿਰੋਜ਼ਪੁਰ 24 ਜੁਲਾਈ 2024 (ਅਨੁਜ ਕੱਕੜ ਟੀਨੂੰ)
ਸੀ.ਆਰ.ਐਮ. ਸਕੀਮ ਅਧੀਨ ਸਾਲ 2023-24 ਦੌਰਾਨ ਜਿਹੜੇ ਕਿਸਾਨਾਂ ਨੂੰ ਖੇਤੀ ਮਸ਼ੀਨੀ ਸਬਸਿਡੀ ਤੇ ਦਿੱਤੀ ਗਈ ਸੀ, ਇਸ ਖੇਤੀ ਮਸ਼ੀਨਰੀ ਦੀ ਖੇਤੀਬਾੜੀ ਵਿਭਾਗ ਫ਼ਿਰੋਜ਼ਪੁਰ ਦੁਆਰਾ ਪਿਛਲੇ ਸਾਲ 1 ਨਵੰਬਰ 2023 ਤੇ 8 ਦਸੰਬਰ 2023 ਨੂੰ ਵੈਰੀਫਿਕੇਸ਼ਨ ਕੀਤੀ ਗਈ ਸੀ। ਪਰੰਤੂ ਚੋਣ ਜਾਬਤਾ ਹੋਣ ਕਰਕੇ ਕੁੱਝ ਮਸ਼ੀਨਾਂ ਦੀ ਫਿਜ਼ੀਕਲ ਵੈਰੀਫਿਕੇਸ਼ਨ ਬਕਾਇਆ ਰਹਿ ਗਈ ਸੀ। ਹੁਣ ਪੰਜਾਬ ਸਰਕਾਰ ਵੱਲੋਂ ਬਕਾਇਆ ਰਹਿ ਗਈ ਖੇਤੀ ਮਸ਼ੀਨਾਂ ਦੀ ਸਬਸਿਡੀ ਜਾਰੀ ਕਰਵਾਉਣ ਲਈ ਵੈਰੀਫਿਕੇਸਨ ਦੀ ਮਿਤੀ 26 ਜੁਲਾਈ 2024 ਨੂੰ ਰੱਖੀ ਗਈ ਹੈ।
ਇਹ ਜਾਣਕਾਰੀ ਦਿੰਦਿਆਂ ਮੁੱਖ ਖੇਤੀਬਾੜੀ ਅਫਸਰ ਡਾ. ਜੰਗੀਰ ਸਿੰਘ ਨੇ ਦੱਸਿਆ ਕਿ ਫਿਰੋਜ਼ਪੁਰ ਜ਼ਿਲ੍ਹੇ ਵਿੱਚ ਇਨ੍ਹਾਂ ਮਸ਼ੀਨਾਂ ਦੀ ਵੈਰੀਫਿਕੇਸਨ ਬਲਾਕ ਵਾਈਜ ਬਲਾਕ ਖੇਤੀਬਾੜੀ ਅਫ਼ਸਰ ਦੀ ਅਗਵਾਈ ਵਿੱਚ ਬਣਾਈਆਂ ਗਈਆਂ ਟੀਮਾਂ ਦੁਆਰਾ ਕੀਤੀ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਬਲਾਕ ਫ਼ਿਰੋਜ਼ਪੁਰ ਦੀ ਵੈਰੀਫਿਕੇਸ਼ਨ ਟੀ-ਪੁਆਇਟ ਕਿਲ਼ੇ ਵਾਲਾ ਚੌਂਕ ਵਿਖੇ, ਬਲਾਕ ਮਮਦੋਟ ਦੀ ਵੈਰੀਫਿਕੇਸ਼ਨ ਦਾਣਾ ਮੰਡੀ ਲੱਖੋ ਕੇ ਬਹਿਰਾਮ ਵਿਖੇ ਤੇ ਬਲਾਕ ਗੁਰੂਹਰਸਹਾਏ ਦੀ ਵੈਰੀਫਿਕੇਸ਼ਨ ਬਲਾਕ ਖੇਤੀਬਾੜੀ ਅਫ਼ਸਰ ਦੇ ਦਫ਼ਤਰ ਵਿਖੇ ਹੋਵੇਗੀ। ਇਸੇ ਤਰ੍ਹਾਂ ਬਲਾਕ ਘੱਲ ਖੁਰਦ ਦੀ ਵੈਰੀਫਿਕੇਸ਼ਨ ਬਲਾਕ ਖੇਤੀਬਾੜੀ ਅਫ਼ਸਰ ਦੇ ਦਫ਼ਤਰ ਮੱਲਵਾਲ, ਬਲਾਕ ਜ਼ੀਰਾ ਦੀ ਵੈਰੀਫਿਕੇਸ਼ਨ ਬਲਾਕ ਖੇਤੀਬਾੜੀ ਅਫ਼ਸਰ ਦੇ ਦਫ਼ਤਰ ਜ਼ੀਰਾ ਅਤੇ ਮਖੂ ਬਲਾਕ ਦੀ ਵੈਰੀਫ਼ਿਕੇਸ਼ਨ ਖੇਤੀਬਾੜੀ ਅਫ਼ਸਰ ਦੇ ਦਫ਼ਤਰ ਪਿੰਡ ਤਲਵੰਡੀ ਨਿਪਾਲਾ ਨਜ਼ਦੀਕ ਮਖੂ ਵਿਖੇ ਕੀਤੀ ਜਾਵੇਗੀ।