ਅੱਜ ਲੱਗੇਗਾ ਲਾਵਾਰਿਸ ਖਾਤਿਆਂ ਦੀ ਜਮਾਂ ਰਾਸ਼ੀ ਦੇ ਨਿਪਟਾਰੇ ਲਈ ਵਿਸ਼ਾਲ ਜਨ ਜਾਗਰੂਕਤਾ ਕੈਂਪ 

ਫਿਰੋਜ਼ਪੁਰ/ਮੱਖੂ, 27 ਨਵੰਬਰ 2025 (ਸਿਟੀਜਨਜ਼ ਵੋਇਸ)

ਭਾਰਤ ਸਰਕਾਰ ਦੇ ਵਿੱਤ ਮੰਤਰਾਲੇ ਦੁਆਰਾ ਜਾਰੀ “ਤੁਹਾਡੀ ਪੂੰਜੀ – ਤੁਹਾਡਾ ਅਧਿਕਾਰ” ਜਨਤਕ ਜਾਗਰੂਕਤਾ ਮੁਹਿੰਮ 1 ਅਕਤੂਬਰ 2025 ਤੋਂ 31 ਦਸੰਬਰ 2025 ਤੱਕ ਚਲਾਈ ਗਈ ਹੈ, ਜਿਸ ਦੇ ਤਹਿਤ ਲੀਡ ਜ਼ਿਲ੍ਹਾ ਪ੍ਰਬੰਧਕ ਭਾਰਤ ਸਰਕਾਰ ਅਤੇ ਭਾਰਤੀ ਰਿਜ਼ਰਵ ਬੈਂਕ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਸਾਰੀਆਂ ਵਿੱਤੀ ਸੰਸਥਾਵਾਂ ਨਾਲ ਸੰਪਰਕ ਕਰਨਗੇ। ਫਿਰੋਜ਼ਪੁਰ ਜ਼ਿਲੇ ਵਿੱਚ 28 ਨਵੰਬਰ 2025 ਨੂੰ ਨਗਰ ਕਾਊਂਸਲ ਪਾਰਕ ਮੱਖੂ ਵਿਖੇ ਸਵੇਰੇ 11.00 ਵਜੇ ਇੱਕ ਵਿਸ਼ਾਲ ਕੈਂਪ ਲਗਾਇਆ ਜਾਵੇਗਾ, ਜਿਸ ਵਿੱਚ ਬੈਂਕ, ਬੀਮਾ, ਪੈਨਸ਼ਨ ਅਤੇ ਮਿਊਚਲ ਫੰਡ ਵਿਭਾਗਾਂ ਦੇ ਉੱਚ ਅਧਿਕਾਰੀ ਭਾਗ ਲੈਣਗੇ। ਇਹ ਜਾਣਕਾਰੀ ਜ਼ਿਲ੍ਹਾ ਲੀਡ ਬੈਂਕ ਮੈਨੇਜਰ ਗੀਤਾ ਮਹਿਤਾ ਨੇ ਦਿੱਤੀ|

       ਪੰਜਾਬ ਨੈਸ਼ਨਲ ਬੈਂਕ ਦੇ ਲੀਡ ਜ਼ਿਲ੍ਹਾ ਬੈਂਕ ਦੀ ਚੀਫ਼ ਮੈਨੇਜਰ ਸ੍ਰੀਮਤੀ ਗੀਤਾ ਮਹਿਤਾ ਨੇ ਦੱਸਿਆ ਕਿ ਵਿੱਤ ਮੰਤਰਾਲੇ ਵੱਲੋਂ ਸ਼ੁਰੂ ਕੀਤੀ ਗਈ “ਤੁਹਾਡੀ ਪੂੰਜੀ – ਤੁਹਾਡਾ ਅਧਿਕਾਰ” ਜਨ ਜਾਗਰੂਕਤਾ ਮੁਹਿੰਮ ਤਹਿਤ ਹੁਣ ਤੱਕ ਪੰਜਾਬ ਦੇ 13 ਜ਼ਿਲ੍ਹਿਆਂ ਵਿੱਚ ਵਿਸ਼ਾਲ ਕੈਂਪ ਲਗਾਏ ਜਾ ਚੁੱਕੇ ਹਨ ਅਤੇ ਛੇਵੇਂ ਪੜਾਅ ਵਿੱਚ ਫਿਰੋਜ਼ਪੁਰ, ਮੋਗਾ, ਜ਼ਿਲ੍ਹਾ ਬੈਂਕ, ਸੰਗਰੂਰ, ਮੁਕਤਸਰ ਅਤੇ ਜ਼ਿਲ੍ਹਾ ਬੀਮਾ ਬੈਂਕਾਂ ਵਿੱਚ ਵਿਸ਼ਾਲ ਕੈਂਪ 28 ਨਵੰਬਰ 2025 ਨੂੰ ਲਗਾਏ ਜਾ ਰਹੇ ਹਨ। ਪਹਿਲਾਂ ਲਗਾਏ ਜਾ ਚੁੱਕੇ ਕੈੰਪਾਂ ਵਿੱਚ ਵੀ ਬੀਮਾ, ਪੈਨਸ਼ਨ ਅਤੇ ਮਿਊਚਲ ਫੰਡ ਆਦਿ ਵਿਭਾਗਾਂ ਨੇ ਭਾਗ ਲਿਆ।

 ਉਨਾ ਅੱਗੇ ਕਿਹਾ ਕਿ ਜੇਕਰ ਬੈਂਕ ਵਿੱਚ ਜਮ੍ਹਾਂ ਕਰਵਾਈ ਗਈ ਰਕਮ ਮਿੱਥੇ ਸਮੇਂ ਤੱਕ ਪ੍ਰਾਪਤ ਨਹੀਂ ਹੁੰਦੀ ਹੈ ਤਾਂ ਉਹ ਖਾਤਾ ਬੰਦ ਹੋ ਜਾਂਦਾ ਹੈ ਅਤੇ ਇਹ ਜਮ੍ਹਾਂ ਕੀਤੀ ਗਈ ਰਕਮ 10 ਸਾਲਾਂ ਬਾਅਦ ਭਾਰਤੀ ਰਿਜ਼ਰਵ ਬੈਂਕ ਕੋਲ ਜਾਂਦੀ ਹੈ। ਇਸੇ ਤਰ੍ਹਾਂ, ਪਰਿਪੱਕਤਾ ਮਿਤੀ ‘ਤੇ ਮਿਉਚੁਅਲ ਫੰਡਾਂ ਅਤੇ ਬੀਮੇ ਵਿੱਚ ਨਿਵੇਸ਼ ਕੀਤੀ ਰਕਮ ਪ੍ਰਾਪਤ ਕਰਨਾ ਵੀ ਮਹੱਤਵਪੂਰਨ ਹੈ। ਕੈਂਪ ਵਿੱਚ ਲਾਵਾਰਸ ਪੁਰਾਣੀਆਂ ਜਮ੍ਹਾਂ ਰਕਮਾਂ, ਮਿਊਚੁਅਲ ਫੰਡ, ਬੀਮੇ ਦੇ ਪੈਸੇ ਆਦਿ ਜੋ ਕਿ ਨਿਰਧਾਰਤ ਮਿਤੀ ਬੀਤ ਜਾਣ ਤੋਂ ਬਾਅਦ ਵੀ ਪ੍ਰਾਪਤ ਨਹੀਂ ਹੋਏ ਹਨ, ਬਾਰੇ ਵਿਸਥਾਰ ਪੂਰਵਕ ਜਾਣਕਾਰੀ ਦਿੱਤੀ ਜਾਵੇਗੀ। ਅਜਿਹੇ ਜਾਗਰੂਕਤਾ ਕੈਂਪ ਸਾਰੇ ਰਾਜਾਂ ਵਿੱਚ ਲਗਾਏ ਜਾ ਰਹੇ ਹਨ ਤਾਂ ਜੋ ਪੁਰਾਣੀ ਲਾਵਾਰਿਸ ਜਮ੍ਹਾਂ ਰਕਮ ਨੂੰ ਉਸਦੇ ਅਸਲ ਮਾਲਕ ਜਾਂ ਨਾਮਜ਼ਦ ਜਾਂ ਕਾਨੂੰਨੀ ਵਾਰਸਾਂ ਨੂੰ ਵਾਪਸ ਮੋੜਿਆ ਜਾ ਸਕੇ।

 ਵਧੇਰੇ ਜਾਣਕਾਰੀ ਲਈ, ਤੁਸੀਂ ਭਾਰਤੀ ਰਿਜ਼ਰਵ ਬੈਂਕ ਦੇ ਉਦਗਮ ਪੋਰਟਲ ਅਤੇ ਆਪਣੀ ਨਜ਼ਦੀਕੀ ਬੈਂਕ ਸ਼ਾਖਾ ਨਾਲ ਸੰਪਰਕ ਕਰ ਸਕਦੇ ਹੋ ਅਤੇ ਆਪਣੀ ਪੁਰਾਣੀ ਜਮ੍ਹਾਂ ਰਕਮ ਪ੍ਰਾਪਤ ਕਰ ਸਕਦੇ ਹੋ। ਇਸ ਮੁਹਿੰਮ ਦੌਰਾਨ ਗਾਹਕ ਆਪਣੇ ਖਾਤੇ ਵਿੱਚ ਕੇਵਾਈਸੀ ਅਤੇ ਨਾਮਜ਼ਦਗੀ ਨੂੰ ਵੀ ਅਪਡੇਟ ਕਰ ਸਕਦੇ ਹਨ।