ਜਗਰਾਓਂ ਪੁਲਿਸ ਤੇ ਸਿਵਲ ਹਸਪਤਾਲ ਦੀ ਨਲਾਇਕੀ, ਕੀੜਿਆਂ ਨੇ ਖਾਧੀ ‘ਲਾਸ਼’, ਭੜਕੇ ਪਰਿਵਾਰਕ ਮੈਂਬਰਾਂ ਕੀਤਾ ਰੋਸ ਪ੍ਰਦਰਸ਼ਨ
ਜਗਰਾਓਂ ਪੁਲਿਸ ਤੇ ਸਿਵਲ ਹਸਪਤਾਲ ਦੀ ਨਲਾਇਕੀ, ਕੀੜਿਆਂ ਨੇ ਖਾਧੀ ‘ਲਾਸ਼’, ਭੜਕੇ ਪਰਿਵਾਰਕ ਮੈਂਬਰਾਂ ਕੀਤਾ ਰੋਸ ਪ੍ਰਦਰਸ਼ਨ
ਜਗਰਾਓਂ 12 ਅਕਤੂਬਰ 2022(ਸਿਟੀਜ਼ਨਜ਼ ਵੋਇਸ)
ਜਗਰਾਓਂ ਪੁਲਿਸ ਤੇ ਸਿਵਲ ਹਸਪਤਾਲ ਦੀ ਲਾਪਰਵਾਹੀ ਕਾਰਨ ਵਿਆਹੁਤਾ ਦੀ ਲਾਸ਼ ਨੂੰ ਕੀੜੇ ਖਾ ਗਏ। ਇਸ ਤੋਂ ਭੜਕੇ ਪਰਿਵਾਰਕ ਮੈਂਬਰਾਂ ਤੇ ਉਨ੍ਹਾਂ ਦੇ ਹਮਾਇਤੀਆਂ ਨੇ ਸਾਬਕਾ ਵਿਧਾਇਕ ਤਰਸੇਮ ਜੋਧਾਂ ਦੀ ਅਗਵਾਈ ਹੇਠ ਜਗਰਾਓਂ ਸਿਵਲ ਹਸਪਤਾਲ ਘੇਰਦਿਆਂ ਸੜਕ ਜਾਮ ਕਰ ਦਿੱਤੀ। ਭਡ਼ਕੇ ਲੋਕਾਂ ਨੇ ਪੁਲਿਸ ਅਤੇ ਸਿਵਲ ਹਸਪਤਾਲ ਦੀ ਨਾਲਾਇਕੀ, ਧੱਕੇਸ਼ਾਹੀ, ਲਾਪਰਵਾਹੀ ਦਾ ਰੋਣਾ ਰੋਂਦਿਆਂ ਵਿਰੋਧ ਪ੍ਰਦਰਸ਼ਨ ਕੀਤਾ।ਵੱਡੀ ਗਿਣਤੀ ’ਚ ਪੀੜਤ ਪਰਿਵਾਰ ਨਾਲ ਪੁੱਜੀਆਂ ਔਰਤਾਂ ਨੇ ਵੀ ਪਿੱਟ-ਸਿਆਪਾ ਕਰਦਿਆਂ ਰੋਸ ਪ੍ਰਗਟਾਇਆ।
ਜਾਣਕਾਰੀ ਅਨੁਸਾਰ ਜਗਰਾਓਂ ਦੀ ਇੰਦਰਾ ਕਾਲੋਨੀ ਵਾਸੀ ਕੁਲਵਿੰਦਰ ਕੌਰ ਦੀ ਧੀ ਮਨਪ੍ਰੀਤ ਕੌਰ ਦਾ ਵਿਆਹ ਪਿੰਡ ਗਗੜਾ ਦੇ ਬਚਿੱਤਰ ਸਿੰਘ ਨਾਲ 10 ਦਸੰਬਰ, 2018 ਨੂੰ ਹੋਇਆ ਸੀ। ਵਿਆਹ ਤੋਂ ਬਾਅਦ ਪਰਿਵਾਰਕ ਝਗਡ਼ਾ ਸ਼ੁਰੂ ਹੋ ਗਿਆ। ਇਸ ਦੇ ਪਿੱਛੇ ਪੀਡ਼ਤ ਪਰਿਵਾਰ ਦਾ ਦੋਸ਼ ਸੀ ਕਿ ਪੂਜਾ ਦੇ ਪਤੀ ਬਚਿੱਤਰ ਸਿੰਘ ਦੇ ਕਿਸੇ ਔਰਤ ਨਾਲ ਨਾਜਾਇਜ਼ ਸਬੰਧ ਸਨ। 7 ਅਕਤੂਬਰ ਨੂੰ ਪੂਜਾ ਅਚਾਨਕ ਘਰੋਂ ਲਾਪਤਾ ਹੋ ਗਈ ਜਿਸ ਦਾ ਪਤਾ ਲੱਗਦੇ ਹੀ ਪੀਡ਼ਤ ਪਰਿਵਾਰ ਨੇ 7 ਅਕਤੂਬਰ ਦੀ ਸ਼ਾਮ ਨੂੰ ਹੀ ਥਾਣਾ ਸਿਟੀ ਵਿਖੇ ਪੂਜਾ ਦੀ ਲਾਪਤਾ ਦੀ ਸ਼ਿਕਾਇਤ ਕਰ ਦਿੱਤੀ। ਇਸੇ ਦੌਰਾਨ ਸਿਟੀ ਪੁਲਿਸ ਨੇ ਇਕ ਦਿਨ ਪਹਿਲਾਂ ਅਲੀਗਡ਼੍ਹ ਪਿੰਡ ਨੇਡ਼ੇ ਰਸਤੇ ਵਿਚ 6 ਅਕਤੂਬਰ ਨੂੰ ਬਰਾਮਦ ਹੋਈ ਅਣਪਛਾਤੀ ਲਾਸ਼ ਬਾਰੇ ਪੀੜਤ ਪਰਿਵਾਰ ਨਾਲ ਗੱਲ ਹੀ ਨਾ ਕੀਤੀ। ਅਖੀਰ 10 ਅਕਤੂਬਰ ਨੂੰ ਪੀਡ਼ਤ ਪਰਿਵਾਰ ਥਾਣਾ ਸਿਟੀ ਦੀ ਪੁਲਿਸ ਨੂੰ ਮਿਲੀ ਉਕਤ ਅਣਪਛਾਤੀ ਲਾਸ਼ ਦੇਖਣ ਗਿਆ ਤਾਂ ਪਰਿਵਾਰਕ ਮੈਂਬਰਾਂ ਦੇਹੋਸ਼ ਉਡ ਗਏ। ਉਸ ਲਾਸ਼ ਵਿਚ ਸੈਂਕਡ਼ਿਆਂ ਦੀ ਤਾਦਾਦ ਵਿਚ ਕੀਡ਼ੇ ਚੱਲ ਰਹੇ ਸਨ ਅਤੇ ਕੀਡ਼ਿਆਂ ਨੇ ਲਾਸ਼ ਨੂੰ ਬੁਰੀ ਤਰ੍ਹਾਂ ਖਾ ਲਿਆ ਸੀ।
ਇਸ ਤੋਂ ਬਾਅਦ ਪੀਡ਼ਤ ਪਰਿਵਾਰ ਆਪਾ ਗੁਆ ਬੈਠਾ ਤੇ ਉਨ੍ਹਾਂ ਪੁਲਿਸ ਤੇ ਸਿਵਲ ਹਸਪਤਾਲ ਖ਼ਿਲਾਫ਼ ਜ਼ੋਰਦਾਰ ਨਾਅਰੇਬਾਜ਼ੀ ਕਰਦਿਆਂ ਸਡ਼ਕ ਜਾਮ ਕਰ ਦਿੱਤੀ। ਇਸ ਮੌਕੇ ਸਾਬਕਾ ਵਿਧਾਇਕ ਤਰਸੇਮ ਜੋਧਾਂ ਨੇ ਜਗਰਾਓਂ ਪੁਲਿਸ ਦੀ ਲਾਪਰਵਾਹੀ ਦਾ ਖੁਲਾਸਾ ਕਰਦਿਆਂ ਕਿਹਾ ਕਿ ਇਸ ਲਾਪਰਵਾਹੀ ਨੇ ਵਿਆਹੁਤਾ ਦੀ ਜਾਨ ਲੈ ਲਈ। ਜੇ ਪੁਲਿਸ ਪਹਿਲੀ ਦਰਖਾਸਤ ’ਤੇ ਹੀ ਕਾਰਵਾਈ ਕਰ ਲੈਂਦੀ ਤਾਂ ਅੱਜ ਇਹ ਦਿਨ ਨਹੀਂ ਦੇਖਣਾ ਪੈਣਾ ਸੀ। ਦੂਜਾ ਵਹਿਸ਼ੀ ਬਣੇ ਸਿਵਲ ਹਸਪਤਾਲ ਨੇ ਪੀਡ਼ਤਾ ਦੀ ਲਾਸ਼ ਨੂੰ ਖਰਾਬ ਫਰਿੱਜ ਵਿਚ ਰੱਖ ਕੇ ਖਰਾਬ ਕਰ ਦਿੱਤਾ। ਕੀਡ਼ਿਆਂ ਵੱਲੋਂ ਖਾਧੀ ਲਾਸ਼ ਮੌਜੂਦਾ ਸਿਸਟਮ ਦੇ ਮੂੰਹ ’ਤੇ ਵੀ ਚਪੇਡ਼ ਹੈ। ਅਜਿਹੇ ਰਾਜ-ਭਾਗ ਵਿਚ ਵੱਡੀਆਂ ਅਸਾਮੀਆਂ ’ਤੇ ਬੈਠੀ ਅਫਸਰਸ਼ਾਹੀ ਦੀ ਮਨਮਰਜ਼ੀ ਕਾਰਨ ਇਨਸਾਨ ਦੀ ਲਾਸ਼ ਵੀ ਰੁਲ਼ ਰਹੀ ਹੈ।
