ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਗਿਰੋਹ ਦੇ 5 ਮੈਂਬਰ ਕਾਬੂ , ਚੋਰੀ ਦਾ ਮਾਲ ਕਰਵਾਇਆ ਗਿਆ ਬਰਾਮਦ
ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਗਿਰੋਹ ਦੇ 5 ਮੈਂਬਰ ਕਾਬੂ , ਚੋਰੀ ਦਾ ਮਾਲ ਕਰਵਾਇਆ ਗਿਆ ਬਰਾਮਦ
ਫ਼ਿਰੋਜ਼ਪੁਰ, 08 ਅਪ੍ਰੈਲ 2024 ( ਅਨੁਜ ਕੱਕੜ ਟੀਨੂੰ)
ਸੀ.ਆਈ.ਏ ਸਟਾਫ ਫਿਰੋਜਪੁਰ ਦੀ ਪੁਲਿਸ ਟੀਮ ਵੱਲੋਂ ਪੰਜਾਬ ਦੇ ਵੱਖ-ਵੱਖ ਜਿਲ੍ਹਿਆਂ ਵਿੱਚ ਰਾਤ ਸਮੇ ਦੁਕਾਨਾ ਭੰਨ ਕੇ ਭਾਰੀ ਮਾਤਰਾ ਵਿੱਚ ਅਨਾਜ, ਫੀਡ, ਚਾਵਲ, ਵੜੇਵੇਂ, ਮੂੰਗਫਲੀ ਆਦਿ ਚੋਰੀ ਕਰਨ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕਰਦੇ ਹੋਏ ਇਸ ਗਿਰੋਹ ਦੇ ਚਾਰ ਮੈਂਬਰਾਂ ਖਿਲਾਫ ਮੁਕੱਦਮਾ ਨੰਬਰ 49 ਮਿਤੀ 06-04-2024 ਅ/ਧ 379,411 ਆਈ.ਪੀ.ਸੀ ਥਾਣਾ ਸਦਰ ਫਿਰੋਜਪੁਰ ਦਰਜ ਕਰਵਾਇਆ ਗਿਆ ਅਤੇ ਅੱਜ ਤਫਤੀਸ਼ ਦੌਰਾਨ ਇਹਨਾ ਆਰੋਪੀਆਂ ਨੂੰ ਮੁਕਦਮੇ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ ਅਤੇ ਇਹਨਾ ਵੱਲੋਂ ਪਹਿਲਾਂ ਤੋਂ ਚੋਰੀ ਕੀਤਾ ਮਾਲ 35 ਗੱਟੇ ਚਾਵਲ ਅਤੇ 10 ਗੱਟੇ ਵੜੇਵੇਂ ਅਤੇ ਵਾਰਦਾਤ ਵਿੱਚ ਇਹਨਾ ਵੱਲੋਂ ਵਰਤਿਆ ਜਾਣ ਵਾਲਾ ਵਹੀਕਲ ਇੱਕ ਗੱਡੀ ਬਲੈਰੋ ਰੰਗ ਚਿੱਟਾ ਨੰਬਰੀ ਪੀ ਬੀ 06 ਵੀ 7984 ਬ੍ਰਾਮਦ ਕੀਤੀ ਗਈ। ਇਹਨਾ ਆਰੋਪੀਆਂ ਨੂੰ ਕੱਲ ਪੇਸ਼ ਅਦਾਲਤ ਕਰਕੇ ਦੋ ਦਿਨ ਦਾ ਪੁਲਿਸ ਰਿਮਾਂਡ ਹਾਸਿਲ ਕੀਤਾ ਗਿਆ ਸੀ।
ਮਿਤੀ 07-04-2024 ਨੂੰ ਆਰੋਪੀਆਂ ਦੀ ਦੁਬਾਰਾ ਪੁਛਗਿੱਛ ਕੀਤੇ ਜਾਣ ਤੇ ਇਹਨਾ ਨਾਲ ਚੋਰੀ ਦੀਆਂ ਵਾਰਦਾਤਾਂ ਵਿੱਚ ਸ਼ਾਮਲ ਰਹੇ ਵਿਅਕਤੀ ਜੱਜੂ ਪੁੱਤਰ ਨਾਮਲੂਮ ਵਾਸੀ ਪਿੰਡ ਜੋਗੇ ਵਾਲਾ ਥਾਣਾ ਮੱਖੂ ਜਿਲ੍ਹਾ ਫਿਰੋਜਪੁਰ ਨੂੰ ਅਤੇ ਇਹਨਾ ਪਾਸੋਂ ਚੋਰੀ ਦਾ ਮਾਲ ਖਰੀਦ ਕਰਨ ਵਾਲੇ ਵਿਅਕਤੀ ਸਤਨਾਮ ਸਿੰਘ ਉਰਫ ਸੱਤੂ ਪੁੱਤਰ ਅੱਛਰ ਸਿੰਘ ਵਾਸੀ ਨੱਥੂਪੁਰ ਥਾਣਾ ਚੋਹਲਾ ਸਾਹਿਬ ਜਿਲ੍ਹਾ ਤਰਨਤਾਰਨ ਨੂੰ ਮੁਕੱਦਮਾ ਵਿੱਚ ਬਤੌਰ ਦੋਸ਼ੀ ਨਾਮਜਦ ਕੀਤਾ ਗਿਆ ਸੀ। ਅੱਜ ਤਫਤੀਸ਼ ਦੌਰਾਨ ਮੁਕੱਦਮਾ ਵਿੱਚ ਨਾਮਜਦ ਦੋਸ਼ੀ ਸਤਨਾਮ ਸਿੰਘ ਉਰਫ ਸੱਤੂ ਪੁੱਤਰ ਅੱਛਰ ਸਿੰਘ ਵਾਸੀ ਨੱਥੂਪੁਰ ਥਾਣਾ ਚੋਹਲਾ ਸਾਹਿਬ ਜਿਲ੍ਹਾ ਤਰਨਤਾਰਨ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਉਸਦੇ ਕਬਜੇ ਵਿੱਚੋਂ ਚੋਰੀ ਦਾ ਮਾਲ 20 ਗੱਟੇ ਚਾਵਲ ਅਤੇ ਉਸਦੀ ਢੋਆ ਢੁਆਈ ਕਰਨ ਵਾਲਾ ਵਹੀਕਲ ਇੱਹ ਗੱਡੀ ਮਹਿੰਦਰਾ ਬਲੈਰੋ ਰੰਗ ਚਿੱਟਾ ਨੰਬਰੀ ਪੀ ਬੀ 05 ਵਾਈ 6873 ਬ੍ਰਾਮਦ ਕੀਤੀ ਗਈ ਹੈ। ਆਰੋਪੀਆਂ ਦੀ ਪੁਛਗਿੱਛ ਜਾਰੀ ਹੈ, ਜਿਹਨਾ ਦੀ ਹੋਰ ਡੂੰਘਾਈ ਨਾਲ ਪੁਛਗਿੱਛ ਕਰਕੇ ਇਹਨਾ ਵੱਲੋਂ ਪਹਿਲਾਂ ਕੀਤੀਆਂ ਚੋਰੀ ਦੀਆਂ ਵਾਰਦਾਤਾਂ ਬਾਰੇ ਪਤਾ ਲਗਾ ਕੇ ਮਾਲ ਬ੍ਰਾਮਦ ਕਰਵਾਇਆ ਜਾਵੇਗਾ। ਤਫਤੀਸ਼ ਅਜੇ ਜਾਰੀ ਹੈ।
