ਫਿਰੋਜ਼ਪੁਰ ਵਿੱਚ ਵਧਦੇ ਕਰਾਈਮ ਨਾਲ ਖੌਫ ਦਾ ਮਾਹੌਲ, ਛਾਵਣੀ ’ਚ ਨੌਕਰਾਨੀ ਵੱਲੋਂ ਚੋਰੀ ਦਾ ਨਵਾਂ ਮਾਮਲਾ ਸਾਹਮਣੇ
ਫਿਰੋਜ਼ਪੁਰ ਵਿੱਚ ਵਧਦੇ ਕਰਾਈਮ ਨਾਲ ਖੌਫ ਦਾ ਮਾਹੌਲ, ਛਾਵਣੀ ’ਚ ਨੌਕਰਾਨੀ ਵੱਲੋਂ ਚੋਰੀ ਦਾ ਨਵਾਂ ਮਾਮਲਾ ਸਾਹਮਣੇ
ਫਿਰੋਜ਼ਪੁਰ, 17 ਨਵੰਬਰ 2025 (ਅਨੁਜ ਕੱਕੜ ਟੀਨੂੰ )
ਫਿਰੋਜ਼ਪੁਰ ਵਿੱਚ ਪਿਛਲੇ ਕੁਝ ਸਮਿਆਂ ਤੋਂ ਗੋਲੀਬਾਰੀ, ਲੁੱਟਾਂ-ਖੋਹਾਂ ਅਤੇ ਸਨੈਚਿੰਗ ਦੀਆਂ ਵਧਦੀਆਂ ਘਟਨਾਵਾਂ ਕਾਰਨ ਸ਼ਹਿਰ ਦੇ ਲੋਕ ਖੌਫਜਦਾ ਹੋ ਚੁੱਕੇ ਹਨ। ਲੋਕਾਂ ਦਾ ਕਹਿਣਾ ਹੈ ਕਿ ਘਰੋਂ ਬਾਹਰ ਨਿਕਲਣਾ ਵੀ ਦਿਨੋਂ–ਦਿਨ ਔਖਾ ਹੁੰਦਾ ਜਾ ਰਿਹਾ ਹੈ। ਜੇ ਕਰ ਰਸਤੇ ਚ ਕੀਤੇ ਜਾ ਰਹੇ ਹੋਣ , ਤਾਂ ਲੁੱਟ-ਖੋਹ ਜਾਂ ਗੋਲੀ ਚੱਲਣ ਦਾ ਡਰ, ਅਤੇ ਜੇ ਘਰੋਂ ਬਾਹਰ ਨਿਕਲਣ ਤਾਂ ਘਰ ਵਿੱਚ ਚੋਰੀ ਦਾ ਖਤਰਾ—ਇਹ ਡਰ ਲੋਕਾਂ ਨੂੰ ਹਮੇਸ਼ਾਂ ਘੇਰੀ ਰੱਖਦਾ ਹੈ, ਅਤੇ ਪੁਲਿਸ ਵੱਲੋਂ ਇਹਨੀ ਸਖ਼ਤੀ ਦੇ ਬਾਵਜੂਦ ਵੀ ਕਰਾਈਮ ਘਟਦਾ ਨਜ਼ਰ ਨਹੀਂ ਆ ਰਿਹਾ।।
ਇਸ ਦੌਰਾਨ ਫਿਰੋਜ਼ਪੁਰ ਛਾਵਣੀ ਵਿੱਚੋਂ ਇੱਕ ਨਵਾਂ ਮਾਮਲਾ ਸਾਹਮਣੇ ਆਇਆ ਹੈ। ਆਰਮੀ ਦੇ ਮੇਜਰ ਰਾਘਵ ਸ਼ਰਮਾ, ਜੋ ਛਾਵਣੀ ਦੇ ਆਰਮੀ ਕਵਾਟਰ ਵਿੱਚ ਰਹਿੰਦੇ ਹਨ, ਨੇ ਆਪਣੀ ਨੌਕਰਾਨੀ ਵੱਲੋਂ ਚੋਰੀ ਕਰਨ ਦੀ ਸ਼ਿਕਾਇਤ ਦਰਜ ਕਰਵਾਈ ਹੈ। ਮੇਜਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹਨਾਂ ਨੇ ਆਪਣੇ ਬੱਚੇ ਦੀ ਦੇਖਭਾਲ ਲਈ ਪਿੰਡ ਨਵਾਂ ਪੂਰਬਾਂ, ਚੁੰਗੀ ਨੰਬਰ 8 ਦੀ ਇੱਕ ਮਹਿਲਾ ਨੂੰ ਨੌਕਰੀ ’ਤੇ ਰੱਖਿਆ ਸੀ। ਦੋਨੋਂ ਪਤੀ–ਪਤਨੀ ਆਪਣੇ ਕੰਮ ’ਤੇ ਜਾਂਦੇ ਸਨ ਅਤੇ ਬੱਚੇ ਅਧਿਰਾਜ ਦੀ ਦੇਖਭਾਲ ਉਸ ਮਹਿਲਾ ਦੇ ਹਵਾਲੇ ਹੁੰਦੀ ਸੀ।
ਮੇਜਰ ਦੇ ਮੁਤਾਬਿਕ, ਘਰ ਵਿੱਚ ਰੱਖੇ ਇੱਕ ਅਟੈਚੀ ਵਿੱਚ ਉਹਨਾਂ ਨੇ ਆਪਣੀ ਪਤਨੀ ਦੇ ਦੋ ਮੁੰਦਰੀਆਂ (ਕੀਮਤ 45000 ਰੁਪਏ )ਸੰਭਾਲੀਆਂ ਹੋਈਆਂ ਸਨ। ਕੁਝ ਦਿਨ ਪਹਿਲਾਂ ਉਹਨਾਂ ਦੀ ਨਜ਼ਰ ਪਈ ਕਿ ਅਟੈਚੀ ਵਿੱਚੋਂ ਇਹ ਕੀਮਤੀ ਮੁੰਦਰੀਆਂ ਗਾਇਬ ਹਨ। ਭਾਲ ਕਰਨ ’ਤੇ ਜਦੋਂ ਕੁਝ ਨਹੀਂ ਮਿਲਿਆ, ਤਾਂ ਉਹਨਾਂ ਨੇ ਨੌਕਰਾਨੀ ਨਾਲ ਪੁੱਛਗਿੱਛ ਕੀਤੀ।
ਮੇਜਰ ਨੂੰ ਨੌਕਰਾਨੀ ’ਤੇ ਸ਼ੱਕ ਹੋਇਆ। ਇਸ ਬਾਰੇ ਉਹਨਾਂ ਨੇ ਆਰਮੀ ਪੁਲਿਸ (CMP) ਨੂੰ ਸੂਚਨਾ ਦਿੱਤੀ। CMP ਦੇ ਨਾਇਬ ਸੂਬੇਦਾਰ ਪ੍ਰਭੋਦ ਕੁਮਾਰ ਅਤੇ ਲੇਡੀ ਫੋਰਸ ਮੌਕੇ ’ਤੇ ਪਹੁੰਚੀ ਅਤੇ ਨੌਕਰਾਨੀ ਨਾਲ ਪੁੱਛਗਿੱਛ ਕੀਤੀ। ਪੁੱਛਗਿੱਛ ਦੌਰਾਨ ਮਹਿਲਾ ਨੇ ਕਬੂਲਿਆ ਕਿ ਉਸ ਨੇ ਮੁੰਦਰੀਆਂ ਚੋਰੀ ਕਰਕੇ ਫਿਰੋਜ਼ਪੁਰ ਛਾਵਣੀ ਦੇ ਇੱਕ ਸੁਨਿਆਰੇ ਨੂੰ ਵੇਚ ਦਿੱਤੀਆਂ ਹਨ।
ਪੁਲਿਸ ਨੇ ਮਹਿਲਾ ਨੂੰ ਗ੍ਰਿਫ਼ਤਾਰ ਕਰਕੇ ਉਸ ਉੱਤੇ ਧਾਰਾ 306 BNS ਅਤੇ ਧਾਰਾ 381 IPC ਦੇ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਿਸ ਹੋਰ ਜਾਂਚ ਕਰ ਰਹੀ ਹੈ।
ਲੋਕਾਂ ਦਾ ਕਹਿਣਾ ਹੈ ਕਿ ਪੁਲਿਸ ਮਿਹਨਤ ਕਰਦੀ ਹੈ, ਪਰ ਕਰਾਈਮ ਘਟਦਾ ਨਹੀਂ” ਲੋਕਾਂ ਦਾ ਕਹਿਣਾ ਹੈ ਕਿ ਇੰਨੀ ਮਿਹਨਤ ਅਤੇ ਮੁਹਿੰਮਾਂ ਦੇ ਬਾਵਜੂਦ ਸ਼ਹਿਰ ਵਿੱਚ ਕਰਾਈਮ ਦੇ ਗ੍ਰਾਫ਼ ਵਿੱਚ ਕੋਈ ਵੱਡੀ ਕਮੀ ਨਹੀਂ ਆ ਰਹੀ। ਸਧਾਰਨ ਲੋਕ ਲੁੱਟਾਂ–ਸਨੈਚਿੰਗ, ਗੋਲੀਬਾਰੀ ਅਤੇ ਚੋਰੀਆਂ ਦੇ ਡਰ ਨਾਲ ਜੀਣ ਲਈ ਮਜਬੂਰ ਹਨ।
