ਪਿਤਾ ਵੱਲੋਂ ਨਹਿਰ ਵਿੱਚ ਸੁੱਟੀ ਕੁੜੀ ਜ਼ਿੰਦਾ ਮਿਲੀ — ਬਚਾਅ ਦੀ ਕਹਾਣੀ ਨੇ ਸਭ ਨੂੰ ਹੈਰਾਨ ਕੀਤਾ

-ਪਿਤਾ ਵੱਲੋਂ ਨਹਿਰ ਵਿੱਚ ਸੁੱਟੀ ਕੁੜੀ ਜ਼ਿੰਦਾ ਮਿਲੀ — ਬਚਾਅ ਦੀ ਕਹਾਣੀ ਨੇ ਸਭ ਨੂੰ ਹੈਰਾਨ ਕੀਤਾ

-ਫਿਰੋਜ਼ਪੁਰ ਦੀ ਕਤਲ ਮੰਨੀ ਗਈ ਕੁੜੀ ਜ਼ਿੰਦਾ ਮਿਲੀ — ਤਿੰਨ ਮਹੀਨੇ ਬਾਅਦ ਵਾਪਸੀ ਦੀ ਚੌਕਾਉਣ ਵਾਲੀ ਦਾਸਤਾਨ ਸਾਹਮਣੇ,

ਫਿਰੋਜ਼ਪੁਰ 7 ਦਸੰਬਰ 2025 ( ਅਨੁਜ ਕੱਕੜ ਟੀਨੂੰ )

ਫਿਰੋਜ਼ਪੁਰ ਵਿੱਚ ਇੱਕ ਹੈਰਾਨੀਜਨਕ ਮੋੜ ਤਦ ਸਾਹਮਣੇ ਆਇਆ, ਜਦੋਂ ਇੱਕ ਕੁੜੀ—ਜਿਸਨੂੰ ਉਸਦੇ ਆਪਣੇ ਪਿਤਾ ਵੱਲੋਂ ਮਾਰਿਆ ਗਿਆ ਮੰਨਿਆ ਜਾ ਰਿਹਾ ਸੀ—ਅਚਾਨਕ ਜ਼ਿੰਦਾ ਪ੍ਰਗਟ ਹੋ ਗਈ। ਤਿੰਨ ਮਹੀਨੇ ਪਹਿਲਾਂ ਵਾਇਰਲ ਹੋਈ ਇੱਕ ਵੀਡੀਓ ਨੇ ਪੁਲਿਸ ਅਤੇ ਲੋਕਾਂ ਵਿੱਚ ਹਲਚਲ ਮਚਾ ਦਿੱਤੀ ਸੀ, ਜਿਸ ਵਿੱਚ ਇੱਕ ਵਿਅਕਤੀ ਆਪਣੀ ਧੀ ਦੇ ਹੱਥ ਬੰਨ੍ਹ ਕੇ ਉਸਨੂੰ ਫਿਰੋਜ਼ਪੁਰ ਨਜ਼ਦੀਕ ਨਹਿਰ ਵਿੱਚ ਧੱਕਦਾ ਨਜ਼ਰ ਆ ਰਿਹਾ ਸੀ। ਇਸ ਤੋਂ ਬਾਅਦ ਪਿਤਾ ਨੂੰ ਗ੍ਰਿਫ਼ਤਾਰ ਕਰ ਕੇ ਜੇਲ੍ਹ ਭੇਜਿਆ ਗਿਆ ਸੀ ਅਤੇ ਮੰਨਿਆ ਜਾ ਰਿਹਾ ਸੀ ਕਿ ਕੁੜੀ ਦੀ ਮੌਤ ਹੋ ਚੁੱਕੀ ਹੈ।

ਪਰ ਹੁਣ, ਤਿੰਨ ਮਹੀਨੇ ਦੀ ਚੁੱਪੀ ਤੋਂ ਬਾਅਦ, ਉਹ ਕੁੜੀ ਇੱਕ ਨਿੱਜੀ ਚੈਨਲ ਦੇ ਕੈਮਰੇ ਸਾਹਮਣੇ ਆਈ ਹੈ ਅਤੇ ਆਪਣੀ ਜਾਨ ਬਚਾਉਣ ਦੀ ਪੂਰੀ ਕਹਾਣੀ ਦੱਸ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਉਸ ਨੇ ਕਿਹਾ ਕਿ ਜਦੋਂ ਉਸਨੂੰ ਨਹਿਰ ਵਿੱਚ ਸੁੱਟਿਆ ਗਿਆ, ਤਾਂ ਲਹਿਰਾਂ ਦੇ ਦੌਰਾਨ ਉਸਦੇ ਹੱਥ ਬੰਨੇ ਹੋਏ ਕੱਪੜੇ ਅਚਾਨਕ ਢਿੱਲੇ ਹੋ ਗਏ। ਬਹਿ ਰਹੇ ਪਾਣੀ ਨਾਲ ਸੰਘਰਸ਼ ਕਰਦਿਆਂ ਉਸਦੀ ਨਜ਼ਰ ਕਿਨਾਰੇ ਪਈ ਇੱਕ ਤੇ ਪਈ ਅਤੇ ਉਹ ਉਸਨੂੰ ਫੜ ਕੇ ਬਹੁਤ ਮੁਸ਼ਕਲ ਨਾਲ ਕਿਨਾਰੇ ਤੱਕ ਆ ਪਹੁੰਚੀ।

ਕੁੜੀ ਮੁਤਾਬਕ, ਉਹ ਕਈ ਕਿਲੋਮੀਟਰ ਨਹਿਰ ਦੇ ਨਾਲ-ਨਾਲ ਤੁਰਦੀ ਰਹੀ, ਜਦੋਂ ਇੱਕ ਗੁਜ਼ਰਦੀ ਔਰਤ ਨੇ ਉਸਦੀ ਹਾਲਤ ਵੇਖ ਕੇ ਉਸਦੀ ਮਦਦ ਕੀਤੀ—ਉਸਨੂੰ ਸ਼ਾਲ ਦਿੱਤੀ ਅਤੇ ਫ਼ੋਨ ਦੀ ਸਹਾਇਤਾ ਨਾਲ ਸੰਪਰਕ ਕਰਨ ਲਈ ਕਿਹਾ।

ਜ਼ਿਕਰਯੋਗ ਹੈ ਕਿ 30 ਸਤੰਬਰ ਦੀ ਰਾਤ ਨੂੰ ਲਗਭਗ 9:30 ਵਜੇ ਪਿਤਾ ਸੁਰਜੀਤ ਨੇ ਕੁੜੀ ਦੇ ਹੱਥ ਬੰਨ੍ਹ ਕੇ ਪਿੰਡ ਖਲੀਲਵਾਲਾ ਵਿੱਚੋਂ ਲੰਘਦੀ ਨਹਿਰ ਵਿੱਚ ਧੱਕ ਦਿੱਤਾ ਸੀ ਅਤੇ ਇੱਕ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀ ਸੀ।

ਇਸ ਘਟਨਾ ਦੇ ਬਾਰੇ ਸਭ ਤੋਂ ਵੱਡਾ ਖੁਲਾਸਾ ਇਹ ਹੈ ਕਿ ਕੁੜੀ ਨੇ ਆਪਣੇ ਪਰਿਵਾਰ ਦੁਆਰਾ ਲਗਾਏ ਦੋਸ਼ਾਂ ਨੂੰ ਸਿੱਧਾ ਝੂਠ ਕਰਾਰ ਦਿੱਤਾ। ਉਸ ਨੇ ਦਾਅਵਾ ਕੀਤਾ ਕਿ ਉਹ ਹਮੇਸ਼ਾਂ ਘਰ ਦੇ ਕੰਮ-ਕਾਜ ਤੇ ਜ਼ਿੰਮੇਵਾਰੀਆਂ ਨੂੰ ਨਿਭਾਉਂਦੀ ਆਈ ਹੈ। ਉਸਨੇ ਆਪਣੀ ਮਾਂ ਉੱਤੇ ਇਹ ਦੋਸ਼ ਵੀ ਲਗਾਇਆ ਕਿ ਉਸਦੇ ਕਹਿਣ ‘ਤੇ ਹੀ ਉਸਦੇ ਪਿਤਾ—ਜੋ ਉਸ ਵੇਲੇ ਨਸ਼ੇ ਵਿੱਚ ਸੀ—ਨੇ ਉਸਨੂੰ ਨਹਿਰ ਵਿੱਚ ਧੱਕ ਦਿੱਤਾ ਸੀ।

ਦੂਜੇ ਪਾਸੇ, ਪੁਲਿਸ ਦਾ ਕਹਿਣਾ ਹੈ ਕਿ ਪੀੜਤਾ ਨੇ ਹੁਣ ਤੱਕ ਸਿੱਧਾ ਸੰਪਰਕ ਨਹੀਂ ਕੀਤਾ, ਪਰ ਉਹ ਵਾਇਰਲ ਵੀਡੀਓ ਅਤੇ ਮੀਡੀਆ ਰਾਹੀਂ ਮਾਮਲੇ ਦੀ ਜਾਂਚ ਅੱਗੇ ਵਧਾ ਰਹੀ ਹੈ। ਕੁੜੀ ਨੇ ਕਿਹਾ ਹੈ ਕਿ ਉਹ ਕਾਨੂੰਨੀ ਸਹਾਇਤਾ ਲੈਣ ਦੀ ਯੋਜਨਾ ਬਣਾ ਰਹੀ ਹੈ ਤਾਂ ਜੋ ਪਿਤਾ ਖ਼ਿਲਾਫ਼ ਦਰਜ ਮੌਜੂਦਾ ਮਾਮਲੇ ਦਾ ਮੁੜ ਵੀਚਾਰ ਕੀਤਾ ਜਾ ਸਕੇ।

ਇਹ ਪੂਰਾ ਮਾਮਲਾ ਫਿਰੋਜ਼ਪੁਰ ਵਾਸੀਆਂ ਅਤੇ ਸਾਰੇ ਰਾਜ ਵਿੱਚ ਚਰਚਾ ਦਾ ਵਿਸ਼ਾ ਬਣ ਚੁੱਕਾ ਹੈ, ਕਿਉਂਕਿ ਤਿੰਨ ਮਹੀਨੇ ਤੱਕ ਮ੍ਰਿਤ ਸਮਝੀ ਜਾ ਰਹੀ ਕੁੜੀ ਦਾ ਇਸ ਤਰ੍ਹਾਂ ਵਾਪਸ ਆਉਣਾ ਕਿਸੇ ਫ਼ਿਲਮੀ ਕਹਾਣੀ ਤੋਂ ਘੱਟ ਨਹੀਂ।