ਚੋਣੀ ਮੈਦਾਨ ਸਿਮਟਿਆ: ਪੰਚਾਇਤ ਸੰਮਤੀ ਵਿੱਚ 319 ਤੇ ਜ਼ਿਲ੍ਹਾ ਪਰਿਸ਼ਦ ਵਿੱਚ 66 ਉਮੀਦਵਾਰ ਬਾਕੀ
-ਚੋਣੀ ਮੈਦਾਨ ਸਿਮਟਿਆ: ਪੰਚਾਇਤ ਸੰਮਤੀ ਵਿੱਚ 319 ਤੇ ਜ਼ਿਲ੍ਹਾ ਪਰਿਸ਼ਦ ਵਿੱਚ 66 ਉਮੀਦਵਾਰ ਬਾਕੀ,
-ਫਿਰੋਜ਼ਪੁਰ: ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪਰਿਸ਼ਦ ਚੋਣਾਂ—ਨਾਮਜ਼ਦਗੀਆਂ ਵਾਪਸੀ ਤੋਂ ਬਾਅਦ ਅੰਤਿਮ ਤਸਵੀਰ ਸਾਫ਼,
ਫਿਰੋਜ਼ਪੁਰ 6 ਦਸੰਬਰ 2025 (ਅਨੁਜ ਕੱਕੜ ਟੀਨੂੰ)
ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪਰਿਸ਼ਦ ਦੀਆਂ ਚੋਣਾਂ ਨੂੰ ਲੈ ਕੇ ਅੱਜ ਨਾਮਜ਼ਦਗੀਆਂ ਵਾਪਸ ਲੈਣ ਦਾ ਆਖ਼ਰੀ ਦਿਨ ਸੀ। ਪੜਤਾਲ ਦੀ ਪ੍ਰਕਿਰਿਆ ਮੁਕੰਮਲ ਹੋਣ ਤੋਂ ਬਾਅਦ ਹੁਣ ਦੋਵਾਂ ਚੋਣਾਂ ਲਈ ਅੰਤਿਮ ਉਮੀਦਵਾਰਾਂ ਦੀ ਗਿਣਤੀ ਸਾਹਮਣੇ ਆ ਗਈ ਹੈ।
ਮਿਲੀ ਜਾਣਕਾਰੀ ਮੁਤਾਬਕ:
4 ਦਸੰਬਰ ਤੱਕ ਪੰਚਾਇਤ ਸੰਮਤੀ ਦੇ 112 ਜੋਨਾਂ ਵਿੱਚੋਂ
647 ਨਾਮਜ਼ਦਗੀਆਂ ਦਾਖਲ ਹੋਈਆਂ ਸਨ।
5 ਦਸੰਬਰ ਨੂੰ ਪੜਤਾਲ ਦੌਰਾਨ 440 ਨਾਮਜ਼ਦਗੀਆਂ ਯੋਗ ਕਰਾਰ ਦਿੱਤੀਆਂ ਗਈਆਂ ਸਨ।
ਅੱਜ, ਨਾਮਜ਼ਦਗੀਆਂ ਵਾਪਸ ਲੈਣ ਦੇ ਦਿਨ, ਕਈ ਉਮੀਦਵਾਰਾਂ ਨੇ ਆਪਣੇ ਕਾਗਜ਼ ਵਾਪਸ ਲਏ। ਅੰਤਿਮ ਤੌਰ ’ਤੇ 319 ਉਮੀਦਵਾਰ ਹੀ ਪੰਚਾਇਤ ਸੰਮਤੀ ਚੋਣਾਂ ਲੜਨਗੇ।
ਜ਼ਿਲ੍ਹਾ ਪਰਿਸ਼ਦ ਵਿੱਚ ਵੀ ਕਈ ਮਹੱਤਵਪੂਰਨ ਬਦਲਾਅ ਸਾਹਮਣੇ ਆਏ ਹਨ ਜਿਸ ਤਹਿਤ 14 ਜੋਨਾਂ ਵਿੱਚੋਂ 93 ਨਾਮਜ਼ਦਗੀਆਂ ਦਾਖਲ ਹੋਈਆਂ ਸਨ। ਪੜਤਾਲ ਦੌਰਾਨ 3 ਨਾਮਜ਼ਦਗੀਆਂ ਖਾਰਜ ਹੋਣ ਕਾਰਨ 90 ਉਮੀਦਵਾਰ ਯੋਗ ਰਹਿ ਗਏ।
ਅੱਜ ਵਾਪਸੀ ਦੇ ਦਿਨ 24 ਉਮੀਦਵਾਰਾਂ ਨੇ ਨਾਮਜ਼ਦਗੀਆਂ ਵਾਪਸ ਲੈ ਲਈਆਂ। ਹੁਣ ਕੇਵਲ 66 ਉਮੀਦਵਾਰ ਹੀ ਜ਼ਿਲ੍ਹਾ ਪਰਿਸ਼ਦ ਦੀ ਚੋਣ ਲੜਨਗੇ।
ਇਨ੍ਹਾਂ ਦੋਵਾਂ ਚੋਣਾਂ ਵਿੱਚ ਹੁਣ ਕੇਵਲ ਉਹੀ ਉਮੀਦਵਾਰ ਮੈਦਾਨ ਵਿੱਚ ਰਹਿ ਗਏ ਹਨ ਜਿਨ੍ਹਾਂ ਨੇ ਪੜਤਾਲ ਅਤੇ ਵਾਪਸੀ ਦੀ ਪ੍ਰਕਿਰਿਆ ਪੂਰੀ ਕੀਤੀ ਹੈ।
ਨਾਮਜ਼ਦਗੀਆਂ ਦੀ ਵਾਪਸੀ ਅਤੇ ਪੜਤਾਲ ਦੀ ਪ੍ਰਕਿਰਿਆ ਪੂਰੀ ਹੋਣ ਨਾਲ ਹੁਣ ਚੋਣੀ ਮੈਦਾਨ ਦੀ ਤਸਵੀਰ ਹੋਰ ਵੀ ਸਪੱਸ਼ਟ ਹੁੰਦੀ ਜਾ ਰਹੀ ਹੈ। ਜੇਕਰ ਉਮੀਦਵਾਰਾਂ ਦੀ ਗੱਲ ਕਰੀਏ ਤਾਂ ਹੁਣ ਦਿਖੇਗਾ ਕਿ ਕੌਣ ਆਪਣਾ ਦਾਅ ਮਜ਼ਬੂਤੀ ਨਾਲ ਬਰਕਰਾਰ ਰੱਖਦਾ ਹੈ ਅਤੇ ਕਿਹੜੇ ਦਾਵੇਦਾਰਾਂ ਲਈ 17 ਦਸੰਬਰ ਦਾ ਦਿਨ ਕਿਸਮਤ ਦੇ ਨਵੇਂ ਦਰਵਾਜ਼ੇ ਖੋਲ੍ਹੇਗਾ।
ਜਿਲ੍ਹੇ ਭਰ ਵਿੱਚ ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪਰਿਸ਼ਦ ਦੀਆਂ ਚੋਣਾਂ ਲਈ 14 ਦਸੰਬਰ ਨੂੰ ਵੋਟਿੰਗ ਪ੍ਰਕਿਰਿਆ ਮੁਕੰਮਲ ਕੀਤੀ ਜਾਵੇਗੀ। ਇਸ ਤੋਂ ਬਾਅਦ, ਵੋਟਾਂ ਦੀ ਗਿਣਤੀ ਮਗਰੋਂ 17 ਦਸੰਬਰ ਨੂੰ ਅੰਤਿਮ ਨਤੀਜੇ ਘੋਸ਼ਿਤ ਹੋਣਗੇ, ਜਿਹਨਾਂ ਨਾਲ ਚੋਣੀ ਮਾਹੌਲ ਦਾ ਰੁੱਖ ਸਾਫ਼ ਤੈਅ ਹੋ ਜਾਵੇਗਾ।
