“ਸਾਡਾ ਕਾਮ ਬੋਲਦਾ ਹੈ” ਪੰਜਾਬ ਸਰਕਾਰ ਇਸ ਵਾਹਿਆਤ ਸਰਕਾਰੀ ਵਿਗਿਆਪਨ ‘ਤੇ ਤੁਰੰਤ ਰੋਕ ਲਾਵੇ : ਬੀਰ ਦਵਿੰਦਰ ਸਿੰਘ
- 93 Views
- kakkar.news
- October 1, 2022
- Politics Punjab
“ਸਾਡਾ ਕਾਮ ਬੋਲਦਾ ਹੈ” ਪੰਜਾਬ ਸਰਕਾਰ ਇਸ ਵਾਹਿਆਤ ਸਰਕਾਰੀ ਵਿਗਿਆਪਨ ‘ਤੇ ਤੁਰੰਤ ਰੋਕ ਲਾਵੇ : ਬੀਰ ਦਵਿੰਦਰ ਸਿੰਘ
ਸ਼੍ਰੀ ਅਮਨ ਅਰੋੜਾ, ਲੋਕ ਸੰਪਰਕ ਵਿਭਾਗ ਦੀ ਇਸ ਮਹਾਂ-ਮੂਰਖਤਾ ਦੀ, ਲੋਕ ਸੰਪਰਕ ਮੰਤਰੀ ਹੋਣ ਦੇ ਨਾਤੇ, ਇਖ਼ਲਾਕੀ ਜ਼ਿੰਮੇਵਾਰੀ ਕਬੂਲਦੇ ਹੋਏ ਤੁਰੰਤ ਅਸਤੀਫ਼ਾ ਦੇਣ : ਬੀਰ ਦਵਿੰਦਰ ਸਿੰਘ
ਪਟਿਆਲਾ, 1 ਅਕਤੂਬਰ 2022 :ਸਿਟੀਜ਼ਨਜ਼ ਵੋਇਸ
ਦੇਸ਼ ਦੇ ਟੀ.ਵੀ ਚੈਨਲਾਂ ਤੇ ਪੰਜਾਬ ਸਰਕਾਰ ਵੱਲੋਂ ਕਰੋੜਾਂ ਰੁਪਏ ਖਰਚ ਕੇ ਦਿੱਤਾ ਗਿਆ, ਇੱਕ ਫਾਹਸ਼ ਤੇ ਵਾਹਿਆਤ ਵਿਿਗਆਪਨ “ ਸਾਡਾ ਕਾਮ ਬੋਲਦਾ ਹੈ, ਸਾਡਾ ਕਾਮ ਬੋਲਦਾ ਹੈ, ਸਿਰਫ਼ ਕਾਮ ਬੋਲਦਾ ਹੈ” ਬਾਰ-ਬਾਰ ਦਿਖਾਇਆ ਜਾ ਰਿਹਾ ਹੈ। ਜ਼ਾਹਰ ਹੈ ਕਿ ਇਹ ਬੇਹੱਦ ਮਹਿੰਗਾ ਵਿਿਗਆਪਨ, ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ , ਅਰਵਿੰਦ ਕੇਜਰੀਵਾਲ ਦੇ ਇਸ਼ਾਰੇ ਉੱਤੇ, ਗੁਜਰਾਤ ਅਤੇ ਹਿਮਾਚਲ ਪ੍ਰਦੇਸ਼ ਦੀਆਂ, ਵਿਧਾਨ ਸਭਾਵਾਂ ਦੀਆਂ ਹੋਣ ਵਾਲੀਆਂ ਚੋਣਾਂ ਦੀ ਦ੍ਰਿਸ਼ਟੀ ਵਿੱਚ ਦਿੱਤਾ ਗਿਆ ਹੈ। ਇਨ੍ਹਾਂ ਗੱਲਾਂ ਦਾ ਪ੍ਰਗਟਾਵਾ ਸਾਬਕਾ ਡਿਪਟੀ ਸਪੀਕਰ ਬੀਰ ਦਵਿੰਦਰ ਸਿੰਘ ਨੇ ਕੀਤਾ। ਉਨ੍ਹਾਂ ਕਿਹਾ ਕਿ ਹੋ ਸਕਦਾ ਹੈ, ਕਿ ਇਹ ਵਿਿਗਆਪਨ ਨੂੰ ਵਿਿਗਆਪਤ ਕਰਨ ਸਮੇਂ, ਪੰਜਾਬ ਦੇ ਲੋਕ ਸੰਪਰਕ ਵਿਭਾਗ ਦੇ ਉੱਚ-ਅਧਿਕਾਰੀਆਂ ਨੂੰ ਕੇਵਲ ਗੁਜਰਾਤ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਵੋਟਰਾਂ ਦਾ ਦਰਸ਼ਕ ਸਮੂਹ ਹੀ ਨਜ਼ਰ ਆਉਂਦਾ ਹੋਵੇ, ਉਹ ਇਹ ਤੱਥ ਭੁੱਲ ਹੀ ਗਏ ਕਿ ਇਹ ਵਿਿਗਆਪਨ ਗੁਜਰਾਤ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਹਿੰਦੀ ਜਾਂ ਗੁਜਰਾਤੀ ਚੈਨਲਾਂ ਤੋਂ ਬਿਨਾਂ, ਦੇਸ ਦੇ ਹਿੰਦੀ ਤੇ ਅੰਗਰੇਜ਼ੀ ਦੇ ਬਿਜਲਈ ਮਾਧੀਅਮ ਨਾਲ ਸਬੰਧਤ, ਰਾਸ਼ਟਰੀ ਟੀ.ਵੀ ਚੈਨਲਾਂ ਨੂੰ ਵੀ ਦੇ ਰਹੇ ਹਨ, ਜਿਨ੍ਹਾਂ ਦੇ ਟੈਲੀਵਿਜ਼ਨ ਰਾਹੀ ਪ੍ਰਸਾਰਿਤ ਹੋਣ ਵਾਲੇ ਪਰੋਗਰਾਮਾਂ ਦੀ ਪਹੁੰਚ-ਸੀਮਾਂ, ਦੂਰ-ਸੰਚਾਰ ਦੇ ਮਾਧਿਅਮਾਂ ਰਾਹੀਂ, ਨਾ ਕੇਵਲ ਪੂਰੇ ਦੇਸ਼ ਤੀਕਰ ਹੈ ਸਗੋਂ ਇਸ ਤੋਂ ਵੀ ਦੂਰ ਪੂਰੇ ਵਿਸ਼ਵ ਤੀਕਰ ਹੈ ।
ਹੁਣ ਇਹ ਗੱਲ ਆਮ ਆਦਮੀ ਪਾਰਟੀ ਅਤੇ ਪੰਜਾਬ ਦੀ ਭਗਵੰਤ ਮਾਨ ਸਰਕਾਰ ਨੂੰ ਸਮਝ ਆਉਂਣੀ ਚਾਹੀਦੀ ਸੀ, ਕਿ ਜਦੋਂ ਪੰਜਾਬ ਸਰਕਾਰ ਦਾ, ਭਗਵੰਤ ਮਾਨ ਦੀ ਫੋਟੋ ਵਾਲਾ ਤੇ ਪੰਜਾਬ ਸਰਕਾਰ ਦੀ ਮੋਹਰ (ਅਧਿਕਾਰ-ਚਿੰਨ੍ਹ) ਵਾਲਾ ਸਰਕਾਰੀ ਵਿਿਗਆਪਨ, ਪੂਰੀ ਦੁਨੀਆਂ ਦੇ ਹਰ ਕੋਨੇ ਵਿੱਚ ਵੱਸਦੇ ਪੰਜਾਬੀ ਭਾਈਚਾਰੇ ਨਾਲ ਸਬੰਧਤ ਲੋਕ ਬਾਰ ਬਾਰ ਦੇਖਣਗੇ ਤੇ ਸੁਣਨਗੇ, ਕਿ “ ਸਾਡਾ ਕਾਮ ਬੋਲਦਾ ਹੈ, ਸਾਡਾ ਕਾਮ ਬੋਲਦਾ ਹੈ, ਸਿਰਫ਼ ਕਾਮ ਬੋਲਦਾ ਹੈ” ਤਾਂ ਉਨ੍ਹਾਂ ਦੇ ਪੱਲੇ ਸਿਵਾਏ ਸ਼ਰਮਿੰਦਗੀ ਤੇ ਜ਼ਲਾਲਤ ਤੋਂ, ਹਰੋ ਕੁੱਝ ਵੀ ਪੱਲੇ ਨਹੀਂ ਪਵੇਗਾ ਜਾਂ ਮੁੱਖ ਮੰਤਰੀ, ਪੰਜਾਬੀ ਡਿਕਸਨਰੀ ਦੇ ਹਵਾਲੇ ਨਾਲ, ਵਿਸ਼ਵ ਭਰ ਵਿੱਚ ਵੱਸਦੇ ਪੰਜਾਬੀਆਂ ਨੂੰ ਇਹ ਸਮਝਾ ਦੇਵੇ ਕਿ ‘ਕਾਮ’ ਦੇ ਅਰਥ ਪੰਜਾਬੀ ਵਿੱਚ ਕੀ ਹੁੰਦੇ ਹਨ ? ਆਖਿਰ ਪੰਜਾਬ ਅਤੇ ਪੰਜਾਬ ਤੋਂ ਬਾਹਰ, ਪੂਰੇ ਵਿਸ਼ਵ ਵਿੱਚ ਬੈਠਾ, ਪੰਜਾਬੀ ਭਾਈਚਾਰਾ ਤਾਂ ਇਸ ਬੇਹੁਦਾ ਮਸ਼ਹੂਰੀ ਨੂੰ , ਪੰਜਾਬੀ ਵਿੱਚ ਹੀ ਸੁਣੇਗਾ ਤੇ ਸਮਝੇਗਾ ਤੇ ਆਪਣੇ ਬੱਚਿਆਂ ਤੇ ਪਰਿਵਾਰ ਦੇ ਸਾਹਮਣੇ ਭਗਵੰਤ ਮਾਨ ਦੀ ਸਰਕਾਰ ਦੀ, ਇਸ ਬੇਹੁਦਾ ਹਰਕਤ ਤੇ ਸ਼ਰਮਿੰਦਗੀ ਮਹਿਸੂਸ ਕਰਦਾ ਹੋਇਆਂ, ਮੂੰਹ ਵਿੱਚ ਉਂਗਲਾਂ ਨਹੀਂ ਲਵੇਗਾ ਤੇ ਹੋਰ ਕੀ ਕਰੇਗਾ ?
ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਫੋਟੋ ਵਾਲਾ ਤੇ ਪੰਜਾਬ ਸਰਕਾਰ ਦੀ ਮੋਹਰ (ਅਧਿਕਾਰ-ਚਿੰਨ੍ਹ) ਵਾਲਾ ਸਰਕਾਰੀ ਵਿਿਗਆਪਨ ਜਦੋਂ ਬਾਰ ਬਾਰ ਲਗਾਤਾਰਤਾ ਵਿੱਚ ਬੋਲਦਾ ਹੈ “ਸਾਡਾ ਕਾਮ ਬੋਲਦਾ ਹੈ, ਸਾਡਾ ਕਾਮ ਬੋਲਦਾ ਹੈ, ਸਿਰਫ਼ ਕਾਮ ਬੋਲਦਾ ਹੈ, ਸਾਡਾ ਕਾਮ ਬੋਲਦਾ ਹੈ” ਤਦ ਕੋਈ ਮੰਤਰੀ ਤਾਂ ਪੰਜਾਬ ਸਰਕਾਰ ਵੱਲੋਂ ਸਮਝਾਵੇ, ਕਿ ਆਖਿਰ ਇਸ ਵਾਹਿਆਤ ਵਿਿਗਆਪਨ ਦੇ ਅਰਥ ਕੀ ਹਨ ਤੇ ਇਸਦਾ ਪੰਜਾਬ ਤੇ ਪੰਜਾਬੀਆਂ ਲਈ ਕੀ ਮਹੱਤਵ ਹੈ ?
ਲਿਹਾਜ਼ਾ ਮੇਰੀ ਮੰਗ ਹੈ ਕਿ ਪੰਜਾਬ ਪ੍ਰਾਂਤ ਦੀ ਸਰਕਾਰੀ ਭਾਸ਼ਾ ਤੇ ਦੇਸ਼- ਵਿਦੇਸ਼ ਵੱਸਦੇ ਕਰੋੜਾਂ ਪੰਜਾਬੀਆਂ ਦੀ ਮਾ-ਬੋਲੀ ਨੂੰ, ਇੱਕ ਸਰਕਾਰੀ ਵਿਿਗਆਪਨ ਰਾਹੀਂ ਜਿੱਚ ਕਰਕੇ, ਮਜ਼ਾਕ ਦਾ ਵਿਸ਼ਾ ਬਣਾਉਂਣ ਵਾਲੇ ਪੰਜਾਬ ਦੇ ਮੁੱਖ ਮੰਤਰੀ, ਭਗਵੰਤ ਮਾਨ, ਪੂਰੇ ਪੰਜਾਬੀ ਜਗਤ ਪਾਸੋਂ, ਫੋਰੀ ਮੁਆਫ਼ੀ ਮੰਗਣ ਅਤੇ ਪੰਜਾਬ ਦੇ ਲੋਕ ਸੰਪਰਕ ਮੰਤਰੀ ਸ਼੍ਰੀ ਅਮਨ ਅਰੋੜਾ ਇਸ ਮੂਰਖਤਾ ਭਰੇ ਵਿਿਗਆਪਨ ਦੇ ਪ੍ਰਸਾਰਨ ਲਈ, ਆਪਣੀ ਇਖ਼ਲਾਕੀ ਜ਼ਿੰਮੇਵਾਰੀ ਕਬੂਲਦੇ ਹੋਏ, ਬਤੌਰ ਲੋਕ ਸੰਪਰਕ ਮੰਤਰੀ, ਤੁਰੰਤ ਅਸਤੀਫ਼ਾ ਦੇਣ ਤੇ ਪੰਜਾਬੀਆਂ ਪਾਸੋਂ ਇਸ ਸਰਕਾਰੀ ਲੱਚਰਪੁਣੇ ਲਈ ਮੁਆਫ਼ੀ ਮੰਗਣ ।
ਮੁੱਖ ਮੰਤਰੀ ਪੰਜਾਬ ਸ਼੍ਰੀ ਭਗਵੰਤ ਮਾਨ, ਤੁਰੰਤ ਇਸ ਵਾਹਿਆਤ, ਬੇਹੁਦਾ ਤੇ ਫਾਹਸ਼ ਮਸ਼ਹੂਰੀ ਵਾਲੇ ਇਸ਼ਤਿਹਾਰ ਨੂੰ ਵਾਪਸ ਲੈਣ ਦਾ ਐਲਾਨ ਕਰਨ ਅਤੇ ਇਸ ਮਹਾਂ-ਬੇਵਕੂਫ਼ੀ ਦੀ ਜ਼ਿੰਮੇਵਾਰੀ ਨਿਸ਼ਚਿਤ ਕਰਕੇ, ਪੰਜਾਬ ਲੋਕ ਸੰਪਰਕ ਦੇ ਜ਼ਿੰਮੇਵਾਰ ਅਫ਼ਸਰਾਂ ਦੇ ਖਿਲਾਫ਼, ਜਿਨ੍ਹਾਂ ਨੇ ਇਸ ਵਿਿਗਆਪਨ ਨੂੰ ਮਨਜ਼ੂਰੀ ਦਿੱਤੀ ਹੈ, ਉਨ੍ਹਾਂ ਸਾਰਿਆਂ ਦੇ ਖਿਲਾਫ਼ ਸਖਤ ਕਾਰਵਾਈ ਕਰਨ ।ਇਸ ਤੋਂ ਇਲਾਵਾ ਇਸ ਚਰਚਿਤ ਵਿਿਗਆਪਨ ਦੀ, ਪੰਜਾਬ ਸਰਕਾਰ ਦੇ ਖਜਾਨੇ ਵਿੱਚੋਂ ਕੀਤੀ ਗਈ ਕੁੱਲ ਅਦਾਇਗੀ, ਜੋ ਕਿ ਇੱਕ ਅੰਦਾਜ਼ੇ ਅਨੁਸਾਰ ਲਗਪਗ 40 ਕਰੋੜ ਰੁਪਏ ਬਣਦੀ ਹੈ, ਉਹ ਸਾਰੀ ਰਕਮ ਭਗਵੰਤ ਮਾਨ ਅਤੇ ਆਮ ਆਦਮੀ ਪਾਰਟੀ , ਆਪਣੇ ਪੱਲਿਓਂ, ਪੰਜਾਬ ਦੇ ਖਜ਼ਾਨੇ ਵਿੱਚ ਤੁਰੰਤ ਜਮ੍ਹਾਂ ਕਰਵਾਏ।