ਕੈਦੀਆਂ ਦੀ ਬੱਸ ‘ਤੇ ਡਿੱਗਿਆ ਪਿੱਲਰ, ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ,

ਕੈਦੀਆਂ ਦੀ ਬੱਸ ‘ਤੇ ਡਿੱਗਿਆ ਪਿੱਲਰ, ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ

ਫਾਜ਼ਿਲਕਾ 5 ਅਕਤੂਬਰ 2022

(ਸੁਭਾਸ਼ ਕੱਕੜ)

ਫਾਜ਼ਿਲਕਾ ਦੀ ਪੁਰਾਣੀ ਕਚਹਿਰੀ ਦੇ ਮੇਨ ਗੇਟ ਕੈਦੀਆਂ ਨੂੰ ਲੈਣ ਜਾ ਰਹੀ ਬੱਸ ‘ਤੇ ਇਕ ਪਿੱਲਰ ਡਿੱਗ ਗਿਆ। ਜਾਣਕਾਰੀ ਮੁਤਾਬਕ ਪੰਜਾਬ ਪੁਲਸ ਦੀ ਬੱਸ ਕੈਦੀਆਂ ਨੂੰ ਲੈਣ ਲਈ ਸਬ ਸੁਧਾਰ ਘਰ ਲਈ ਜਾ ਰਹੀ ਸੀ। ਜਦੋਂ ਬੱਸ ਪੁਰਾਣੀ ਕਚਹਿਰੀ ਦੇ ਗੇਟ ‘ਤੇ ਪਹੁੰਚੀ ਤਾਂ ਅਚਾਨਕ ਇਕ ਪਿੱਲਰ ਉਸ ‘ਤੇ ਡਿੱਗ ਗਿਆ।ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਲੋਕਾਂ ਨੇ ਦੱਸਿਆ ਕਿ ਪੁਰਾਣੀ ਕਚਹਿਰੀ ਪਿਛਲੇ ਕਈ ਸਾਲਾਂ ਤੋਂ ਖੰਡਰ ਪਈ ਹੈ ਅਤੇ ਇਸਦੇ ਅੰਦਰ ਸਬ ਸੁਧਾਰ ਘਰ (ਜੇਲ੍ਹ) ਬਣੀ ਹੋਈ ਹੈ। ਕੈਦੀਆਂ ਨੂੰ ਜਿਸ ਰਸਤੇ ਤੋਂ ਲਿਆ ਜਾਂਦਾ ਹੈ , ਉਹ ਰਾਹ ਬਹੁਤ ਛੋਟਾ ਹੈ ਪਰ ਫਿਰ ਵੀ ਉਸ ਰਾਹੀਂ ਬੱਸਾਂ ਨੂੰ ਲੰਘਾਇਆ ਜਾਂਦਾ ਹੈ।ਬੱਸ ਕਾਰਨ ਪਹਿਲਾਂ ਵੀ ਜੇਲ੍ਹ ਨੂੰ ਨੁਕਸਾਨ ਪਹੁੰਚ ਚੁੱਕਿਆ ਹੈ। ਓਧਰ ਹੀ ਜਦੋਂ ਕਰਮਚਾਰੀਆਂ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਉਹ ਲਗਾਤਾਰ ਕੋਸ਼ਿਸ਼ ਕਰ ਰਹੇ ਹਨ ਕਿ ਰਾਹ ‘ਚ ਲੱਗਿਆ ਇਹ ਪਿੱਲਰ ਹਟਾ ਦਿੱਤਾ ਜਾਵੇ। ਸੂਚਨਾ ਮੁਤਾਬਕ ਇਸ ਘਟਨਾ ਦੌਰਾਨ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਪਰ ਜੇਕਰ ਇਸ ਵਿੱਚ ਕੈਦੀ ਹੁੰਦੇ ਤਾਂ ਪੁਲਸ ਨੂੰ ਹੱਥਾਂ-ਪੈਰਾਂ ਦੀ ਪੈ ਜਾਣੀ ਸੀ ਅਤੇ ਪੁਲਸ ਦੀ ਕਾਰਗੁਜ਼ਾਰੀ ‘ਤੇ ਸਵਾਲੀਆਂ ਨਿਸ਼ਾਨ ਲੱਗ ਜਾਣਾ ਸੀ। ਲੋਕਾਂ ਨੇ ਮੰਗ ਕਰਦਿਆਂ ਕਿਹਾ ਕਿ ਸਬ ਸੁਧਾਰ ਘਰ ਨੂੰ ਸ਼ਹਿਰ ‘ਚੋਂ ਬਾਹਰ ਕੱਢਿਆ ਜਾਵੇ ਤਾਂ ਜੋ ਆਉਂਦੇ-ਜਾਂਦੇ ਲੋਕਾਂ ਨੂੰ ਪਰੇਸ਼ਾਨੀ ਨਾ ਆਵੇ।