1971 ਭਾਰਤ ਪਾਕਿ ਯੁੱਧ ਵਿਚ ਦੇਸ਼ ਦੀ ਫਤਹਿ ਦੀ ਯਾਦ ਵਿਚ 16 ਨੂੰ ਫਾਜਿ਼ਲਕਾ ਵਿਖੇ ਹੋਵੇਗੀ ਵਿਜੈ ਦਿਵਸ ਪਰੇਡ
1971 ਭਾਰਤ ਪਾਕਿ ਯੁੱਧ ਵਿਚ ਦੇਸ਼ ਦੀ ਫਤਹਿ ਦੀ ਯਾਦ ਵਿਚ 16 ਨੂੰ ਫਾਜਿ਼ਲਕਾ ਵਿਖੇ ਹੋਵੇਗੀ ਵਿਜੈ ਦਿਵਸ ਪਰੇਡ
ਫਾਜਿ਼ਲਕਾ, 5 ਦਸੰਬਰ 2023 (ਸਿਟੀਜ਼ਨਜ਼ ਵੋਇਸ)
1971 ਦੇ ਭਾਰਤ ਪਾਕਿ ਯੁੱਧ ਵਿਚ ਦੇਸ਼ ਦੀ ਫਤਹਿ ਦੀ ਯਾਦ ਵਿਚ 16 ਦਸੰਬਰ 2023 ਨੂੰ ਫਾਜਿ਼ਲਕਾ ਵਿਖੇ ਵਿਜੈ ਦਿਵਸ ਪਰੇਡ ਹੋਵੇਗੀ ਅਤੇ 17 ਦਸੰਬਰ ਨੂੰ ਸ਼ਹੀਦਾਂ ਦੀ ਸਮਾਧ ਆਸਫਵਾਲਾ ਵਿਖੇ ਵਤਨ ਦੀਆਂ ਸਰਹੱਦਾਂ ਦੀ ਰਾਖੀ ਕਰਦਿਆਂ ਆਪਾ ਕੁਰਬਾਨ ਕਰਨ ਵਾਲੇ ਮਹਾਨ ਸ਼ਹੀਦਾਂ ਨੂੰ ਸਿਜਦਾ ਕਰਨ ਹਿੱਤ ਸਮਾਗਮ ਹੋਵੇਗਾ। ਇਹ ਜਾਣਕਾਰੀ ਜਿ਼ਲ੍ਹੇ ਦੇ ਡਿਪਟੀ ਕਮਿਸ਼ਨਰ ਡਾ: ਸੇਨੂ ਦੁੱਗਲ ਨੇ ਦਿੰਦਿਆਂ ਦੱਸਿਆ ਕਿ ਇਸ ਲਈ ਜਿ਼ਲ੍ਹਾ ਪ੍ਰਸ਼ਾਸਨ ਅਤੇ ਸ਼ਹੀਦਾਂ ਦੀ ਸਮਾਧੀ ਕਮੇਟੀ ਵੱਲੋਂ ਤਿਆਰੀਆਂ ਆਰੰਭ ਦਿੱਤੀਆਂ ਗਈਆਂ ਹਨ।ਇੰਨ੍ਹਾਂ ਸਮਾਗਮਾਂ ਵਿਚ ਪੰਜਾਬ ਦੇ ਕੈਬਨਿਟ ਮੰਤਰੀ ਸ੍ਰੀ ਅਮਨ ਅਰੋੜਾ ਅਤੇ ਫੌਜ ਦੇ ਸੀਨਿਅਰ ਅਧਿਕਾਰੀ ਵੀ ਸਿ਼ਰਕਤ ਕਰਣਗੇ। 1971 ਦੀ ਭਾਰਤ ਪਾਕਿ ਜੰਗ ਵਿਚ ਫਾਜਿ਼ਲਕਾ ਸੈਕਟਰ ਵਿਚ ਭਿਆਨਕ ਯੁੱਧ ਹੋਇਆ ਸੀ ਅਤੇ ਭਾਰਤੀ ਫੌਜ ਦੇ ਵੀਰ ਜਵਾਨਾਂ ਨੇ ਆਪਣੀਆਂ ਸ਼ਹਾਦਤਾਂ ਦੇ ਕੇ ਨਾ ਕੇਵਲ ਮੁਲਕ ਦੀਆਂ ਹੱਦਾਂ ਦੀ ਰਾਖੀ ਕੀਤੀ ਸਗੋਂ ਦੁਸ਼ਮਣ ਨੂੰ ਫਾਜਿ਼ਲਕਾ ਸ਼ਹਿਰ ਵੱਲ ਵੱਧਣ ਤੋਂ ਵੀ ਰੋਕਿਆ ਅਤੇ ਇਸ ਜੰਗ ਵਿਚ ਫਤਹਿ ਹਾਸਲ ਕੀਤੀ। ਇਸੇ ਕਰਕੇ ਇੰਨ੍ਹਾਂ ਫੌਜੀ ਸ਼ਹੀਦਾਂ ਨੂੰ ਫਾਜਿ਼ਲਕਾ ਦੇ ਰਾਖੇ ਦਾ ਖਿਤਾਬ ਵੀ ਦਿੱਤਾ ਜਾਂਦਾ ਹੈ। ਇਸ ਜੰਗ ਵਿਚ ਇਸ ਸੈਕਟਰ ਵਿਚ 228 ਭਾਰਤੀ ਜਵਾਨ ਸ਼ਹੀਦ ਹੋਏ ਸਨ ਅਤੇ ਉਨ੍ਹਾਂ ਦਾ ਆਸਫਵਾਲਾ ਵਿਖੇ ਬਣੀ ਜੰਗੀ ਯਾਦਗਾਰ ਵਾਲੀ ਥਾਂ ਸਿਵਲ ਸੁਸਾਇਟੀ ਵੱਲੋਂ ਅੰਤਮ ਸਸਕਾਰ ਕੀਤਾ ਗਿਆ ਸੀ। ਬਾਅਦ ਵਿਚ ਸ਼ਹਿਰ ਦੇ ਲੋਕਾਂ ਨੇ ਸ਼ਹੀਦਾਂ ਦੀ ਸਮਾਧੀ ਕਮੇਟੀ ਦਾ ਗਠਨ ਕਰਕੇ ਇਸ ਤਾਂ ਸਲਾਨਾ ਸਮਾਗਮ ਕਰਨਾ ਸ਼ੁਰੂ ਕੀਤਾ।
ਸ਼ਹੀਦਾਂ ਦੀ ਸਮਾਧੀ ਕਮੇਟੀ ਦੇ ਪ੍ਰਧਾਨ ਸ੍ਰੀ ਸੰਦੀਪ ਗਿਲਹੋਤਰਾ ਅਤੇ ਜਨਰਲ ਸਕੱਤਰ ਸ੍ਰੀ ਪ੍ਰਫੁਲ ਚੰਦਰ ਨਾਗਪਾਲ ਨੇ ਦੱਸਿਆ ਕਿ ਇੰਨ੍ਹਾਂ ਸ਼ਹੀਦਾਂ ਨੂੰ ਨਮਨ ਕਰਨ ਲਈ ਹਰ ਸਾਲ ਸਮਾਗਮ ਕੀਤਾ ਜਾਂਦਾ ਹੈ। ਇਸ ਵਾਰ ਵੀ 16 ਦਸੰਬਰ ਨੂੰ ਫਾਜਿ਼ਲਕਾ ਦੇ ਡਿਪਟੀ ਕਮਿਸ਼ਨਰ ਦਫਤ਼ਰ ਤੋਂ ਘੰਟਾ ਘਰ ਚੌਕ ਤੱਕ ਵਿਜੈ ਦਿਵਸ ਪਰੇਡ ਕੱਢੀ ਜਾਵੇਗੀ ਜਿਸ ਵਿਚ ਸ਼ਹੀਦ ਪਰਿਵਾਰਾਂ ਦੇ ਮੈਂਬਰ, ਫੌਜ ਦੇ ਅਧਿਕਾਰੀ ਅਤੇ ਸ਼ਹਿਰ ਵਾਸੀ ਦੇਸ਼ ਭਗਤੀ ਦੇ ਜਜ਼ਬੇ ਨਾਲ ਭਾਗ ਲੈਣਗੇ।ਜਿਕਰਯੋਗ ਹੈ ਕਿ 16 ਦਸੰਬਰ 1971 ਨੂੰ ਉਕਤ ਜੰਗ ਵਿਚ ਭਾਰਤ ਦੀ ਵਿਜੈ ਦਾ ਐਲਾਣ ਹੋਇਆ ਸੀ। ਇਸੇ ਤਰਾਂ 17 ਦਸੰਬਰ ਨੂੰ ਸ਼ਹੀਦਾਂ ਦੀ ਸਮਾਧੀ ਵਿਖੇ ਸ਼ਹੀਦਾਂ ਨੂੰ ਸੰਰਧਾਂਜਲੀ ਭੇਂਟ ਕਰਨ ਲਈ ਸਮਾਗਮ ਹੋਵੇਗਾ ਜਿਸ ਵਿਚ ਪੰਜਾਬ ਸਰਕਾਰ ਦੇ ਕੈਬਨਿਟ ਮੰਤਰੀ ਸ੍ਰੀ ਅਮਨ ਅਰੋੜਾ ਸਿਰਕਤ ਕਰਣਗੇ।ਇਸ ਮੌਕੇ ਸ਼ਹੀਦਾਂ ਦੀ ਸਮਾਧੀ ਕਮੇਟੀ ਵੱਲੋਂ ਸ਼ਹੀਦਾਂ ਦੇ ਪਰਿਵਾਰਾਂ ਨੂੰ ਵਿਸੇਸ਼ ਤੌਰ ਤੇ ਸਨਮਾਨਿਤ ਕੀਤਾ ਜਾਵੇਗਾ।
